Áleýmettik meditsinalyq saqtandyrý qorynyń Nur-Sultan qalasy boiynsha filialy direktorynyń orynbasary Ainagúl Dáýletshina emhanaǵa tirkelýdiń úsh tásilin aityp berdi, dep habarlaidy QazAqparat.
«Birinshi tásil – emhananyń tirkeý bólimine baryp, tirkeý týraly ótinish jazý. Bul tásil jasy boiynsha zeinetke shyqqan zeinetkerlerge, múmkindigi shekteýli adamdarǵa, balalarǵa, onyń ishinde shet memleketterde týǵan balalarǵa, sábiler úilerinde turatyn balalarǵa, jetimderge, sottalǵandarǵa, koloniialarda jazasyn óteýshilerge jáne medresede oqityndarǵa, merzimdi qyzmettegi áskeri qyzmetshilerge nemese senimhat boiynsha tirkelýdi resimdeýshilerge ǵana qoljetimdi. Ol úshin sizge jeke kýálik, tólqujat nemese turýǵa ruqsat qujaty qajet. Eger siz 18 jasqa deiingi balany emhanaǵa tirketkińiz kelse, balanyń jáne onyń zańdy ókiliniń - anasynyń, ákesiniń nemese qamqorshysynyń jeke basyn kýálandyratyn qujattaryn usyný qajet», - deidi Ainagúl Dáýletshina.
Onyń aitýynsha ekinshi tásil – halyqqa qyzmet kórsetý ortalyǵy (HQKO) arqyly emhanaǵa tirkeýge ótinim berý. Ol úshin ózińizben birge jeke kýálik, tólqujat nemese turýǵa ruqsat qujaty bolýy qajet. Ótinimniń óńdelý merzimi – bir jumys kúni.
«Úshinshi tásil – úiden shyqpai emhanaǵa tirkelý. Iaǵni, Sizge elektrondy úkimet portaly arqyly ótinim berý jetkilikti. Ol úshin aldymen saittyń basty betindegi «Densaýlyq saqtaý» bólimin tańdańyz. Sodan keiin «Meditsinalyq kómek» qosymsha betindegi «meditsinalyq-sanitariialyq alǵashqy kómek kórsetetin meditsinalyq uiymǵa tirkelý» qyzmetine basyńyz. «Qyzmetke onlain tapsyrys berý» batyrmasyn basyńyz. Odan soń tirkelýge suranys jiberý úshin jasyl belgimen belgilengen barlyq tarmaqtardy toltyrý qajet. Suranysty sátti jibergennen keiin siz «suranym óńdelýde» mártebesin kóresiz. Tańdaǵan emhanańyzǵa tirkelý týraly jaýap Sizdiń jeke kabinetińizge bir jumys kúni ishinde keledi», - deidi ol.
