Foto: Habar24
Farmatsevtikalyq naryqta iri qarjylyq zańbuzýshylyq áshkerelendi. "Interfarmservis" jaýapkershiligi shekteýli seriktestiginiń basshylary 3,7 mlrd teńge jymqyrdy degen kúdikke ilindi. Bul týraly Qarjylyq monitoring agenttigi habarlady.
Atalǵan kompaniia Diýshenn bulshyqet distrofiiasyn emdeýge arnalǵan dárilik preparattardy bes jyl boiy Qazaqstanǵa jetkizip kelgen. Óndirýshi tarap bul dárilerge shekti baǵa belgilegenimen, kompaniia basshylyǵy qosymsha paida tabý maqsatynda jetkizý tizbegine Birikken Arab Ámirlikterinde tirkelgen ózderine baǵynysty uiymdy engizip, jalǵan mámileler jasaǵan.
Osy shema arqyly preparattardyń baǵasy negizsiz qymbattatylyp, iri kólemde zańsyz paida alynǵan.
Sonymen qatar, salyqtan jaltarý úshin ártúrli jeke kásipkerlermen jalǵan kelisimder jasalyp, jalǵan shot-faktýralar arqyly qarajat qolma-qol aqshaǵa ainaldyrylǵan. Nátijesinde 4 mlrd teńgeden astam qarjy zańsyz shyǵarylyp, memleketke 637 mln teńgeden astam salyq tólenbegen.
Tergeý málimetinshe, zańsyz tabys esebinen kúdiktiler 32 páter, 11 avtokólik jáne 8 turǵyn úi satyp alǵan. Bul múlikke tárkileý maqsatynda tyiym salyndy.
Qazirgi tańda eki kúdikti úiqamaqta otyr, al úshinshi tulǵaǵa kepil túrindegi bultartpaý sharasy qoldanylǵan.
