Tájikstanda prezident Emomali Rahmonnyń dana oilary men pikirleri jinaqtalǵan kitap jaryqqa shyqty, - dep habarlaidy "Ult aqparat" Azattyqqa silteme jasap.
Rahmonnyń aǵa keńesshisi Zafar Saidzodtyń aitýynsha, "Tájikstan prezidenti, beibitshilik pen ulttyq birliktiń negizin salýshynyń dana oilary men támsilderi" dep atalatyn, 464 paraqtan turatyn kitabynyń tirajy 500 dana. Kitaptyń elektrondyq nusqasy ulttyq kitaphananyń vebsaityna jariialanǵan. Kitapta Rahmonnyń beibitshilik, táýelsizdik, tarih jáne áielder týraly oilary berilgen.
"Ulttyq memlekettilik, onyń barlyq atribýttary men simvoldary árbir tájik áieliniń oi-sanasy men jan-dúniesine ornyǵyp, ana súti arqyly urpaqtan urpaqqa berilýi tiis" delingen kitaptaǵy úzindilerdiń birinde.
Kitapty orys tiline aýdaryp basý da josparlanyp otyr.
Tájikstandy shirek ǵasyr boiy basqaryp kele jatqan Emomali Rahmonǵa 2015 jyly parlament "ult kóshbasshysy" degen mártebe bergen.
2016 jyly Tájikstanda konstitýtsiiaǵa Rahmonǵa prezident sailaýyna taǵy da túsýine erekshe quqyq beretin túzetýler engizilgen.
Tájik biliginiń saiasaty Rahmondy Tájikstandy táýelsizdik alǵan soń bastalǵan bes jyldyq azamattyq soǵysynda beibitshilikke jetkizgen qutqarýshy sipatynda nasihattaidy. Biraq Rahmon biligin synaityndar onyń rejimin adam quqyǵyn únemi buzady dep aiyptaidy.
