QR Densaýlyq saqtaý ministri Eljan Birtanov Qytaidan kelip jatqan qazaqstandyqtarǵa úndeý joldady, – dep habarlaidy QazAqparat.
«Qytaiǵa baryp kelgen Qazaqstan azamattaryna bir nárseni aitqym keledi. Olarmen bailanysqa shyǵý múmkin bolmai jatady. Sońǵy 14 kún ishinde QHR-dan jáne oǵan kórshiles elderden kelgen barlyq azamattar turǵylyqty mekenjaiy boiynsha emhanaǵa kelýi kerek jáne óz dárigerine tirkeýge turyp, densaýlyǵyn teksertýi qajet», - dedi ministr Úkimet úiinde ótken baspasóz máslihatynda.
«Bul óz qaýipsizdikterińiz úshin kerek. Bizdiń meditsinalyq mamandar baqylaý júrgizip, densaýlyǵyńyz nasharlaǵan jaǵdaida shara qabyldasa, ózińiz ben otbasyńyzdyń ózge múshelerine tónetin qaýip seiiledi», - dedi Eljan Birtanov.
Buǵan deiin ministr Ýhannan jetkizilgen qazaqstandyq stýdentterdiń arnaiy korpýsta tekseriletinin aitqan edi.
Sońǵy málimetterge sáikes, qazir Qytai aýmaǵynda 1300 qazaqstandyq bar. Onyń 635-i Hainan provintsiiasynda júr, 204 adam - elshilik pen konsýldyqtyń, kompaniialardyń qyzmetkerleri, olardyń otbasy jáne 445 qazaqstandyq jalpy Qytai aýmaǵynda júr. Qazirgi ýaqytta QHR aýmaǵynan 25 858 adam keldi.
Onyń arasynda qyzýy kóterilip kelgen 23 jolaýshynyń tórteýi JRVI kúdigimen aýrýhanaǵa jatqyzyldy.
