QR Densaýlyq saqtaý ministrliginiń resmi ókili Dias Ahmetshárip burynǵy vitse-ministr Kamaljan Nadyrovtan ózge qyzmetkerlerge KVI juǵýy múmkin ba degen suraqqa jaýap berdi, - dep habarlaidy "Ult aqparat".
«Ózderińizge belgili, 30 naýryzdan bastap, Densaýlyq saqtaý ministrligi tolyqtai qashyqtan jumysqa kóshken bolatyn. Sondyqtan, ministrlik ishinde dert juqtyrý qaýpi minimaldy, qyzmetkerlerdiń 90 paiyzy úiden jumys istep otyr. Jumysta ministrdiń ózi (Eljan Birtanov - red.) jáne 3-4 adam ǵana qaldy. Olardyń da árqaisysy jeke kabinette bolǵandyqtan, juqtyrý qaýpi az degen oidamyz. Degenmen, búgin ministr Eljan Amantaev koronavirýs infektsiiasyna test tapsyrady. Nátijesi shyqqan soń, árine habarlaimyz», - dedi Dias Ahmetshárip.
Onyń aitýynsha, K.Nadyrovpen jaqyn jáne yqtimal bailanysta bolǵandar anyqtalyp jatyr. Epidemiologiialyq tekserý bastaldy.
«Sońǵy kúnderi Kamaljan Nadyrov ministr tapsyrmasymen Almaty oblysynda boldy. Almaty qalasynda emhanadan aýrý oshaǵy shyǵyp, dárigerlerdiń arasynda túsinispeýshilik týǵanda da, K. Nadyrov barǵan edi. Árine, qorǵanys kiimin kiip, barlyq talaptardy saqtady. Degenmen, aýrýdyń kimnen, qai jerden juqqanyn anyqtaýymyz qajet. Ol kisi qazir qai kúni qaida bolǵanyn, kimmen kezdeskenin tizbektep jazyp otyr. Bailanysta bolǵan barlyq adamdarǵa PTR arqyly diagnostika jasalady», - dedi resmi ókil.
Aita ketsek, Densaýlyq saqtaý vitse-ministri bolǵan Kamaljan Nadyrov koronavirýs infektsiiasyn juqtyryp, aýrýhanaǵa jatqyzyldy. Ol Almaty qalasy Densaýlyq saqtaý basqarmasynyń basshysy qyzmetine kirisýi kerek edi. Buǵan deiin ministrlik ókili D.Ahmetshárip K.Nadyrovtyń qandai halde jatqanyn aityp bergen edi.
