QR DSM basshysy Eljan Birtanov qaza bolǵan dárigerdiń otbasyna qaiǵyryp kóńil aitty, dep habarlaidy "Ult aqparat" QazAqparat agenttigine silteme jasap.
«Qazaqstan meditsinasy aýyr qazaǵa ushyrady. Qyzmet atqarý ústinde eki dárigerimiz kóz jumdy. Kásibi bilikti dárigerler - ginekologiia men akýsherlik iste 20 jyldyq tájiribesi bar meditsina ǵylymdarynyń doktory Patsaev Talǵat Ánapiuly men reanimatsiia salasynda 30 jyldyq tájiribesi bar, professor, meditsina ǵylymdarynyń doktory Jánibek Artyqbaev óz isiniń has mamany bolatyn. Olar bosanǵannan keiin aýyr jaǵdaida jatqan áieldi qutqarý jolynda óz ómirlerin qidy.
Jaqynda ǵana barsha álem halyqaralyq dárigerler kúnin atap ótken bolatyn. DDU, «Shekarasyz dáriger» uiymynyń bastamasymen atap ótiletin mereke adam densaýlyǵyn saqtaýda dárigerlerdiń ólsheýsiz rólin kórsetýge baǵyttalǵan.
Kúndelikti bizdiń dárigerler qalada ia aýylda, kúndiz-túni adam ómirin arashalap qalý jolynda tynbai eńbek etip keledi.
Ózgeniń ómirin saqtaimyn dep ózderi kóz jumǵan dárigerlerimizdiń aldynda basymdy iemin.
Bul biz úshin orny tolmas qaiǵyly jaǵdai.
Barlyq meditsina mamandarynyń atynan qaza bolǵan dárigerlerdiń otbasyna, ekipaj músheleriniń otbasyna qaiǵyryp kóńil aitamyn. Menińshe, olar erlik jasady», - dedi ministr Feisbýktegi paraqshasynda.
Aita keteiik, kúni keshe ǵana Almatydan əýege kóterilgen shaǵyn aviatsiia ushaǵy apatqa ushyraǵan edi. Almaty oblysy aýmaǵynan tabylǵan áýe kemesiniń bortynda eki ushqysh pen úsh dáriger bolǵan. Olardyń máiiti ushaq qulaǵan jerden tabyldy.
Dárigerler OQO-daǵy jas bosanǵan, aýyr jaǵdaidaǵy áieldi qaraýǵa shuǵyl attanǵan.
