© Sputnik / Vladislav Vodnev
Eltańbany aýystyrýǵa qatysty sheshim qabyldaý komissiiasy qurylady. Bul týraly Úkimet otyrysynan keiingi brifingte Qarjy ministri Mádi Takiev aitty.
«Elbańbany aýystyrýǵa qatysty másele belgili bir kezeńnen beri talqylanyp kele jatqanyn jaqsy bilesizder. Prezident Ulttyq quryltaida atalǵan máseleni talqylaýdy usyndy. Memleket basshysy eger qoǵam bul máselege jappai qoldaý bildirse, onda ony odan ary talqylaý qajettigin aitty. Ol úshin arnaýly komissiia qurylady. Komissiia atalǵan máseleni tyńǵylyqty qarastyratyn bolady. Eger bul máselege qatysty oń sheshim qabyldanǵan jaǵdaida, shyǵystaryna qatysty qalǵan jaittar týyndaidy», — dedi ministr.
Osy oraida Mádi Takiev elbańbany aýystyrýǵa qansha qarjy jumsalatyndyǵyn, qandai qarjy kózderinen qarjylandyrylatyndyǵyn aitpady.
«Aldymen birinshi máseleni sheship alaiyq, odan keiin ekinshisin qarastyramyz», — dedi ol.
Prezident Ulttyq quryltaidyń úshinshi otyrysyndaǵy sózinde ulttyq biregeiligimizdiń memlekettik rámizderde aiqyn kórinis tapqanyn atap ótken edi.
«Eltańbamyzǵa qatysty syni pikirler aitylyp qalady. Ony Keńes zamanyndaǵy Gerbke uqsatyp jatady. Tym eklektikalyq, kúrdeli deidi. Mundai oidy el isine bei-jai qaramaityn belsendi azamattar ǵana emes, mamandar da aityp júr. Oryndy paiymdar eskerýsiz qalmaýy kerek. Ortaq kelisimge kelgen jaǵdaida arnaýly komissiia qurýǵa bolady. Bul komissiia máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baiqaý jariialanady», — degen bolatyn Qasym-Jomart Toqaev.
