Syrtqy ister ministrliginiń resmi ókili Aibek Smadiiarov Mysyrda jumbaq jaǵdaida qaza bolǵan Qazaqstan elshiligi qyzmetkeriniń ólimine qatysty túsinikteme berdi, - dep habarlaidy Sputnik Qazaqstan.
Onyń aitýynsha, 2019 jyldyń 13 jeltoqsanynda kúndizgi saǵat 11:15-te Qazaqstannyń Mysyrdaǵy elshiliginiń ekinshi hatshysy Elaman Joldasovtyń jubaiy úiiniń kireberisinen kúieýiniń máiitin tapqan.
"Ol birinshi kezekte elshilikke habarlasty. Bizdiń diplomattar 5-7 minýt ishinde oqiǵa ornyna jetip, tiisti sheshimdi qabyldady. Sondai-aq oqiǵa ornyna politsiia, jedel járdem, prokýratýra men kriminaldy politsiianyń tergeý toptary shaqyryldy", - dedi ol Syrtqy ister ministrliginde ótken brifingte.
Sonymen qatar Aibek Smadiiarov 15 jeltoqsanda Qazaqstannyń syrtqy ister ministrliginiń ókilderi qyzmettik tekseris júrgizý úshin Kairge jiberilgenin atap ótti.
"Qazirgi ýaqytta Mysyr prokýratýrasy bul iske qatysty tergeý júrgizip jatyr. Tergeý sheńberinde qyzmetkerdiń máiitine sot-meditsinalyq saraptama jasaldy. Onyń nátijesi jaqyn arada Qazaqstanǵa beriledi. Sondai-aq syrtqy ister ministrligi diplomattyń denesi Qazaqstanǵa jetkizilgennen keiin qosymsha sot-meditsinalyq sarapta júrgiziledi", - dedi resmi ókil.
Ol qaiǵyly jaǵdai Syrtqy ister ministrliginiń ujymyna aýyr tigenin atap ótti.
Aita keteiik, osyǵan deiin Qazaqstannyń Mysyrdaǵy elshiliginiń qyzmetkeri Elaman Joldasovtyń jumbaq jaǵdaida qaza tapqany týraly málimet taraǵan bolatyn."Elaman óte parasatty jáne jaýapty adam boldy, óz isiniń jáne arab tiliniń jaqsy mamany edi. Ol Mysyrdyń buqaralyq aqparat quraldaryna jii suhbat berip, teledidardan sóz sóilep júrdi. Syrtqy ister ministrligi júiesinde 2013 jyldan bastap jumys istedi. 2017 jyldyń mamyr aiynan Qazaqstannyń Mysyrdaǵy elshiliginiń mádeni-gýmanitarlyq máseleler jónindegi ekinshi hatshysy qyzmetin atqardy. Basshylyq pen áriptesteri arasynda joǵary bedelge ie bolǵan", - dep túiindedi sózin Aibek Smadiiarov.
