Elordanyń 16 turǵyn úi alabynda 300 myńǵa jýyq halyq turady. Bul týraly búgin qala turǵyndarymen esep berý kezdesýinde elorda ákimi Altai Kólginov aitty, dep habarlaidy QazAqparat.
«Qalada barlyǵy 16 turǵyn alaby bar, onda 300 myńǵa jýyq adam turady. Bul - búkil elorda halqynyń tórtten biri. Turǵyn alaptary turǵyndaryn ne mazalaidy? Biz problemalardy saraptama, toptaǵan kezde mynadai máselelerdi anyqtadyq. Birinshisi - káriz júiesi, sý qubyry, gazdandyrý syndy injenerlik infraqurylym. Kelesisi – kógaldandyrý, jol infraqurylymyn damytý, áleýmettik nysandar salý, emhana, mektep, sport nysandary. 2020 jyly aýqymdy jumys júrgizdik», - dedi qala basshysy.
Elorda ákimi jekemenshik uiymdardyń ókilderimen birneshe ret kezdesýdiń arqasynda, úidiń ishine gaz tartý qunyn ortasha alǵanda 30 paiyzǵa tómendetý múmkin bolǵanyn aitty.
«Gaz tartý boiynsha úlken jumys atqaryldy. Biylǵy jylytý maýsymynda Temirjol, Kóktal-2 turǵyn alaptarynynyń turǵyndary, Agroqalashyqtyń bir bóligi gazǵa kóshý múmkindigine ie boldy. Qazir Kóktal-1, Óndiris, Ońtústik-Shyǵys turǵyn alaptarynda qurylys-montaj jumystary júrip jatyr. 300 shaqyrym gaz taratý jelileri salyndy. Gazdandyrý – Elbasynyń tarihi jobasy», - dedi Altai Kólginov.
Onyń aitýynsha, 2020 jyly elordanyń turǵyn alaptarynda 100 astam kóshege asfalt tóseldi, 40 astam qoǵamdyq keńistik, aýlalar abattandyryldy. Birqatar áleýmettik nysan salyndy, onyń ishinde mektepter de bar.
