Táýelsizdik dańǵylynda jańa kópir salynady. Ol Táýelsizdik saraiynan Kerei, Jánibek handar kóshesine deiin jalǵasatyn bolady. Kópir Nur-Sultan qalasyndaǵy kólik qozǵalysyn aitarlyqtai azaitady, dep habarlaidy "Ult aqparat".
Ákimdik málimetinshe, jańa kópirdiń eskizderin qalalyq ýrbanistika ortalyǵy ázirlegen.
Kópirdiń jalpy uzyndyǵy - 910 m, eni – 36 m, shamdardyń biiktigi - 5-ten 16 metrge deiin jetedi. Kópir shamdary masaq túrinde jasalady.
Jobanyń negizgi ideiasy tyń jerlerdi igerý tarihi oqiǵasymen bailanysty.
Kópirde ornalasqan tórt baǵan oiý-órnektermen bezendiriledi.
Kópirde trotýar jáne velosiped jolaqtary da qarastyrylǵan. Ol elordanyń oń jáne sol jaǵalaýyn jalǵaidy.
Bul qurylys «Nur-Sultan-jaily qala» master–jospary aiasynda júrgizilýde. Sonymen qatar, buqaralyq sportty damytý úshin jańa kópir astyndaǵy qoǵamdyq keńistik qurylady.
«Táýelsizdik dańǵylynan jalǵasatyn jańa kópir elordamyzdyń tarihi ótkenin beineleidi. Kópir sol jáne oń jaǵalaýdy jalǵap, ákimshilik ortalyqtan jańa temirjol vokzalyna deiin jol júrý ýaqytyn qysqartyp, jolaýshylar aǵynyn jeńildetetini mańyzdy», - dep atap ótti Nur-Sultan qalasynyń ýrbanistika ortalyǵynyń basshysy Elnar Bazyken.
Jańa kópirdiń qurylysy kelesi jylǵa josparlanǵan.
