El óńirleriniń Astananyń 20 jyldyq mereitoiyna daiyndap jatqan tartýlary belgili boldy, dep habarlaidy "Ult Aqparat" Elorda Info saityna silteme jasap.
Elorda ákimi Áset Isekeshevtiń halyqpen eseptik kezdesýinde belgili bolǵandai, bas qalanyń biylǵy mereitoiyna aimaqtar bir-bir áleýmettik mańyzǵa ie nysandardy salyp bermek.
Atap aitqanda Aqtóbe obylys «Beibitshilik qaqpasy» kompozitsiiasyn, Almaty qalasy 240 oryndyq balabaqsha salýdy, Almaty oblysy Arai saiabaǵy bazasynda sporttyq-saýyqtyrý qalalyq parkin, al Atyraý oblysy Esil ózeni arqyly ótetin velosipedshiler men jaiaý júrginshilerge arnalǵan kópir salýdy kózdep otyr.
Shyǵys qazaqstan oblysy biyl shilde aiynda ashylatyn Botanikalyq saiabaqqa jaryqty-mýzykalyq fontan, Qyzylorda oblysy «Kosmos» taqyrybyna ashyq alańy bar gúlzar men ekspozitsiia tartýdy jón sanaǵan.
Biyl elordada «Qazaq eline myń alǵys!» monýmenti men jaiaý júrginshiler býlvary paida bolady. Bul - Astanaǵa Qaraǵandy oblysynyń daiyndap otyrǵan syiy.
Batys Qazaqstan oblysy Jeńis pen Bógenbai batyr dańǵyldarynyń qiylysynda gúlzar salmaq, al Mańǵystaý oblysy Dostyq úiin qaita jóndeý qurylystaryn júrgizedi, sondai-aq OQO, SQO, Pavlodar, Qostanai, Aqmola jáne Jambyl oblystary esebinen qalalyq saiabaqtan bastap Ilinka kentine deiin qashyqtyǵy 56 shaqyrym velojol salynady.
Áset Isekeshevtiń aitýynsha, Astananyń 20 jyldyq mereitoiynda elordada 645-ten astam mádeni-buqaralyq shara ótkizý josparlanyp otyr.
