Memleket basshysy Qasym-Jomart Toqaev Aqmola oblysyn damytý máseleleri jónindegi keńeste birqatar máselele kóterdi, dep habarlaidy "Ult aqparat" Prezidenttik baspasóz hatshysy Berik Ýálidiń Facebook paraqshasyna silteme jasap.
«Búgin ózderińizben Kókshe tórinde júzdesip otyrmyz. Arqanyń airyqsha sulý aimaǵy – búkil elimizdiń mereii ári maqtanyshy. Bul – tarihy tereń, tabiǵaty ǵajaiyp kieli ólke. Tuǵyry biik tulǵalar shyqqan qasterli óńir. Elordany ainala qorshap jatqan Aqmolanyń strategiialyq mańyzy joǵary. Osy jerdiń turǵyndary el ekonomikasyn órkendetýge eleýli úles qosyp keledi», - dep atap ótti jiynda Memleket basshysy.
Qasym-Jomart Toqaev oblystyń búgingi tynys-tirshiligimen qatar, damý keleshegi – elimiz úshin óte mańyzdy mindetter qatarynda ekenin tilge tiek etti.
«Men Joldaýda aityp óttim: ekonomikalyq ósimdi jáne tyń ózgeristerdi elimizdiń árbir turǵyny sezinýi qajet. Biz halyqtyń ál-aýqatyn arttyrýdy árdaiym basty nazarda ustaýymyz kerek. Óńirde turatyn azamattarymyzdyń turmys sapasy joǵary standarttarǵa sai bolýy tiis. Bul, eń aldymen, jergilikti halyq turǵyn-úi, áleýmettik qoldaý, infraqurylym siiaqty igilikterdi kórýi tiis degen sóz. Sol sebepti barlyq deńgeidegi ákimder jumysty jańa talapqa sai, tiimdi uiymdastyrýy qajet. Osyǵan orai, búgingi jiynda Aqmola oblysyn damytý máselelerin qarastyramyz», - dedi Prezident.
