Elordada tórtinshi qabattaǵy páterdiń ashyq turǵan terezesiniń jaqtaýyna shyǵyp ketken sábi qutqaryldy, dep habarlaidy "Ult aqparat".
Nur-Sultan qalalyq Politsiia departamentiniń málimetinshe, qala turǵyndarynyń biri 102 nómirine qońyraý shalyp, E-16 kóshesi boiyndaǵy turǵyn úi páteriniń birinde ashyq turǵan terezege kishkentai bala shyǵyp alǵanyn, jylap anasyn shaqyratyndyǵyn jáne onyń qulap ketý qaýpi bar ekendigin habarlaǵan. Oqiǵa ornyna patrýldik politsiia ekipajy jiberilgen. Politsiia kapitany Ádilet Dalabaev pen aǵa leitenant Áýelhan Mutalhan 4-shi qabattaǵy páterdi birden tapqanymen esigi syrtynan jabyq bolǵan.
«Olar balany sózge ainaldyryp, páterdiń ishine kirgize aldy jáne esiktiń syrtynan sábimen sóilesip, kóńilin aýlaýǵa tyrysqan. 6 jasar bala úide jalǵyz qalǵan ári óte qorqatyndyǵyn aitqan. Osy ýaqytta politsiia qyzmetkerleri páterdiń jalǵa berilgendigin anyqtap, qojaiynyna qońyraý shalǵan. Olar dereý jetip, esikti ashyp berýin ótinedi. Páterge kirgen politsiia qyzmetkerleri balanyń din-aman ekendigine kóz jetkizgennen keiin osy ýaqytta úiine qarai asyǵyp kele jatqan anasyn kútti. Bala aman-esen ata-anasyna tapsyryldy. Olarǵa balany aldaǵy ýaqytta jalǵyz qaldyrmaý týraly eskertý jasaldy»,- dep atap ótedi departamentten.
