Otandyq «QazVac» vaktsinasynyń 6 myń dozasy Nur-Sultan qalalyq Qoǵamdyq densaýlyq saqtaý basqarmasynyń qoimalaryna jetkizildi. Munan bólek, basqarma qoimalarynda reseilik «Spýtnik-V» preparatyn qosa alǵanda, vaktsinanyń 55 myńǵa jýyq dozasy bar, dep habarlaidy QazAqparat.
«Ótken aptada ǵana qazaqstandyq «QazVac vaktsinasynyń birinshi partiiasy jetkizildi. Endi halyqtyń suraýy men qalaýy boiynsha qazaqstandyq ónimdi ekpe retinde qoldana alamyz. Dáriger retinde jáne eń aldymen, Qazaqstan Respýblikasynyń azamaty retinde elimizdiń vaktsina shyǵarýǵa qabiletti elderdiń qatarynda bolǵany men úshin maqtanarlyq jait»,- dedi Nur-Sultan qalalyq Qoǵamdyq densaýlyq saqtaý basqarmasynyń basshysy Timýr Muratov.
Onyń atap ótýinshe, elorda turǵyndary «Spýtnik-V» men «QazVac» vaktsinalarynyń birin tańdai alady.
«Kúnine 6 myń adamǵa deiin ekpe salynady. Bastapqyda turǵyndar vaktsinaǵa saqtyqpen qarady. Biraq vaktsina almaý densaýlyqqa áldeqaida qaýipti ekenin jáne tek osylaisha ózimizdi infektsiiadan qorǵai alamyz degen keń aýqymdy túsindirý jumystaryn júrgizý arqyly azamattar vaktsinalanǵandardyń qataryna óz erkimen qosyla bastady. Halyq arasynda qorqý men senimsizdik joiylyp, óz densaýlyǵy úshin jaýapkershilik arta tústi», - dedi ol.
Sonymen qatar vedomstvo basshysy saýda, oiyn-saýyq ortalyqtarynda vaktsinatsiia pýnkterin ashýdyń tiimdiligin de atap ótti. Búgin elordada vaktsinatsiia pýnkteri «Mega Silk Way», «Keruen», «Han Shatyr» jáne «Abý-Dabi Plaza» saýda ortalyqtarynda ashylǵan. Olarda kúnine 250-ge jýyq adam ekpe alady.
Nur-Sultan qalalyq Qoǵamdyq densaýlyq saqtaý basqarmasy baspasóz qyzmetiniń málimetinshe, halyqty vaktsinamen keń qamtý úshin qala ákimi Altai Kólginovtiń tapsyrmasymen vaktsinatsiia pýnkteriniń sany 36-dan 100-ge deiin arttyryldy. Sondai-aq meditsinalyq-sanitariialyq kómek kórsetý uiymdary úshin jumys ýaqyty 8:00-den 24:00-ge deiin, saýda jáne oiyn-saýyq ortalyǵynda - saǵat 10:00-den 22:00-ge deiin ulǵaityldy.
