Shymkent qalasynda koronavirýs indetinen bir naýqas kóz jumdy. 41 jastaǵy azamat Nur-Sultan qalasynan kelip, Túrkistan oblysynda qurylys kompaniiasynda jumys istegen, dep habarlaidy Qalalyq tótenshe jaǵdailar shtaby.
Marqum 15 maýsym kúni densaýlyǵynyń aýyrlaýyna bailanysty emdeý mekemesine kelgen. Shymkent qalasyndaǵy «Avitsenna» meditsina ortalyǵynda PTR diagnostikalyq zertteý boiynsha COVID-19 analiz tapsyrǵan. Naýqastan alynǵan saraptamasynyń qortyndysy oń nátije kórsetken soń, 16 maýsym kúni jedel járdem qyzmeti arqyly juqpaly aýrýlar aýrýhanasyna jetkizilgen. Jaǵdaiynyń aýyrlyǵyna bailanysty birden jansaqtaý bólimine jatqyzylǵan.
«Aýrýhanaǵa túsken kezinde naýqastyń jaǵdaiy aýyr bolǵandyqtan IVL apparatyna qosylǵan. Emdeý hattamalaryna sáikes naýqasqa barlyq qajetti emdeý is-sharalary júrgizilip, birneshe ret respýblikalyq mamandarmen konsýltatsiialar ótkizilgen. Júrgizilgen reanimatsiialyq sharalarǵa qaramastan, naýqas 17 maýsym kúni tańǵy saǵat 05:40 ótkende qaitys boldy» delingen habarlamada.
