«Arys, bir birgemiz» aktsiiasy aiasynda arystyqtarǵa gýmanitarlyq kómek berý maqsatynda Nur-Sultan qalasynan Túrkistan oblysyna «Qamqorlyq» kómek kerýeni jolǵa shyqty, dep habarlaidy QazAqparat tilshisi.
Kómek kerýeni Báiterek monýmentiniń janynan jolǵa shyqty. Arystyqtardy qoldaý maqsatyndaǵy aitýly sharaǵa reseilik «MÝZ-TV» arnasynyń direktory Arman Dáýletiiarov, otandyq estrada juldyzdary Maira Iliiasova, Sáken Maiǵaziev, Baýyrjan Isaev, Ernar Sadyrbai, aǵaiyndy Júginisovter, akter Ádil Ahmetov keldi.
Mádeniet jáne sport ministrliginiń baspasóz hatshysy Aidar Qyryqbaiulynyń aitýyna qaraǵanda, kómek kerýenin birneshe mekeme jasaqtaǵan. Atap aitqanda, Q.Muńaitpasov atyndaǵy mektep-internaty, «Qazrestavratsiia» mekemesi men «Qazaqkontsert» memlekettik kontserttik uiymy, Sh.Shaiahmetov atyndaǵy «Til-Qazyna» ulttyq ortalyǵy, «Astana Opera» teatr jáne balet teatry, Ulttyq akademiialyq kitaphana, L.Gýmilev atyndaǵy EUÝ men «Qazaq Týrizm» kompaniiasynyń qyzmetkerleri kerýen jasaqtap, Arysqa azyq-túlikter men taýarlardy jóneltti.
«Arysta bolǵan jaǵdaiǵa bailanysty Mádeniet jáne sport ministr Aqtoty Raiymqulovanyń bastamasymen bizdiń vedomstvoǵa qarasty óner oshaqtarynyń basshylary, óner adamdary jumylyp, Arys halqyn rýhani qoldaý maqsatynda Shymkentke ketkenin bilesizder. Mundaǵy maqsat - án aitý nemese bi bileý, turǵyndar rýhani turǵyda qoldaý ekenin atap ótý kerek. Ánshiler óz qaltalarynan 16 mln teńge jinap, Arysqa kómektesýge arnalǵan shotqa aýdardy. Mádeniet jáne sport ministrligi qyzmetkerleri bir kúndik jalaqysyn berdi. Odan bólek, eki qalada kómek shtabyn qurdy. Sol shtabtyń jumyldyrýymen 2 qaladaǵy 3 shtabtan 15 tonna kúrish, 10 tonna un, makaron ónimderi, dári-dármek, matras, jastyq, kórpe, kiim-keshek jinaldy. Bári de jinalǵan somaǵa satyp alyndy», - dedi Aidar Qyryqbaiuly.
Arystyqtarǵa qoldaý bildirý sharasynda Máskeýden arnaiy ushyp kelgen MÝZ-TV» arnasynyń direktory Arman Dáýletiiarov ta sóz sóiledi. Onyń aitýynsha, Arystaǵy qaiǵy - bárine ortaq.
«Ushaqtan jańa ushyp keldim. Arystaǵy oqiǵa - bizdiń ortaq qaiǵymyz. Qazaq bolǵandyqtan emes, qarapaiym adam retinde arystyqtardyń qaiǵysyn bóliskimiz keledi. Óz tarapymyzdan kómek berdik. Eshbir jerde mundai qaiǵy bolmasyn», - dedi Arman Dáýletiiarov.
Óz kezeginde «Qazaqkontsert» memlekettik kontserttik uiymynyń direktory Jeńis Seidýllauly jumyla kótergen júk jeńil ekenin atap ótti.
«Osyndai kezde QR Mádeniet jáne sport ministrligine qarasty óner oshaqtarynyń atynan qolymyzdan kelgenshe kómek berip jatyrmyz. Sol jaqtaǵy adamdar jalǵyzbyz dep oilamasyn. Bólisseń ǵana qaiǵy azaiady», - dedi Jeńis Seidýllauly.
.jpeg)