«Astana LRT» JShS basqarma tóraǵasy Bekmyrza Igenberdinov elordadaǵy jol apatynda mert bolǵan avtobýs júrgizýshisi men jolaýshysy týraly aityp berdi, dep habarlaidy QazAqparat tilshisi.
Onyń aitýynsha, júrgizýshi Abai Ospanov tańǵy 6.30-da reiske shyǵarda meditsinalyq tekserýden ótken jáne densaýlyǵynan esh kinárat baiqalmaǵan.
«Sonymen birge, júrgizýshi 2018 jyly jeltoqsan aiynyń sońynda da meditsinalyq tekserýden ótken. Densaýlyǵy jaqsy bolǵan. Ujymda úlgili qyzmetker bolǵan. 2018 jyly eshqandai jol tártibin buzbaǵan. Qoǵamdyq kólik te josparly tehnikalyq tekserýden ótken, aqaý bolmaǵan. Apattyń naqty sebepteri sot-meditsinalyq saraptama nátijesinde anyqtalady. Ol úshin arnaiy komissiia quryldy», - dedi B. Igenberdinov Astana ákimdiginde ótken baspasóz máslihatynda.
Júrgizýshiniń artynda tórt balasy qaldy, olardyń eń úlkeni - 17 jasta.
«Apatta kóz jumǵandardyń týystaryna barlyq materialdyq kómek kórsetiledi. Sonymen birge, jolaýshy Aizat Nurkenovanyń Qaraǵandy oblysynda týǵany anyqtaldy. Onyń denesin Qaraǵandyǵa jetkizýge kómek beriledi. A. Nurkenovanyń artynda bir balasy qaldy», - dedi B. Igenberdinov.
Sondai-aq, ol zardap shekkenderdi saqtandyrý tártibin túsindirdi.
«Árine, saqtandyrý bar, árbir avtobýs parki jolaýshylar men júkti tutas saqtandyrady. Qazir ótemaqy kólemin aita almaimyn. Eń aldymen, meditsinalyq saraptama júrgizilýi tiis. Sonyń nátijesi boiynsha, saqtandyrý kompaniiasyna habarlasyp, shyǵyn kólemin habarlaimyz jáne ótemaqy kólemi belgilenedi. Óz tarapymyzdan apattan kóz jumǵandardyń otbasyna barlyq qajetti kómekti kórsetemiz», - dedi «Astana LRT» JShS basqarma tóraǵasy Bekmyrza Igenberdinov Astana ákimdiginde ótken baspasóz máslihatynda.
Eske sala ketsek, elordadaǵy jantúrshigerlik kólik apatynan zardap shekkender sany 27-ge jetkenin habarlaǵan edik. Sońǵy málimetke sáikes, zardap shekkender sany 36 adamǵa jetip otyr.
26 naýryz kúni Uly Dala men Qabanbai batyr dańǵyly qiylysynda úsh avtobýstyń jáne jeńil kólikterdiń qaqtyǵysýymen jol-kólik oqiǵasy oryn aldy. Qala mańy baǵdaryndaǵy № 303 avtobýs № 12 baǵdardaǵy jolaýshylar avtobýsymen soqtyǵysty. Osynyń ekpinimen olar № 53 avtobýsqa jáne jedel járdem kóligine baryp soǵyldy.
