Búgin qalalyq psihikalyq densaýlyq ortalyǵynyń (QPDO) bazasynda ornalasqan infektsiialyq statsionardan koronavirýs infektsiiasy diagnozy qoiylǵan sońǵy naýqas emdelip shyqty, dep habarlaidy elorda ákimdiginiń resmi saity.
15 maýsymnan bastap bul ortalyq COVID-19 bar naýqastarǵa arnalǵan juqpaly aýrýlar statsionary bolyp ózgertildi. Bir jarym ai ishinde munda 1044 naýqas emdeldi.
«Búgin sońǵy patsient emdelip shyqty. Bárimiz táýlik boiy jumys istedik. Atap aitqanda, provizor Melissa Sameeva bárin dári-dármektermen qamtamasyz etti, meniń orynbasarym Larisa Gom, bas medbike Gúlnar Altynbekova aldyńǵy qatarda jumys istedi. Tósek-oryndardy qaita beiimdeý, reanimatsiiany ornalastyrý alǵashynda qiyndyq týdyrsa da, biz onyń bárin eńserdik. Bizde Ainagúl Jambýrchinova, Saltanat Mýsina sekildi bilikti dárigerler jumys istedi. Óz komandama joǵary biliktilik tanytqany úshin alǵys bildirgim keledi. Biz qoldan kelgenniń bárin jasadyq» – deidi qalalyq psihikalyq densaýlyq ortalyǵy direktorynyń mindetin atqarýshy Olga Komarova.
58 jastaǵy Ýálihan emhanadaǵy COVID-19-dy jeńgen eń sońǵy naýqas.
«Ortalyq qyzmetkerlerine alǵys bildirgim keledi. Munda 14 shildede túsip, búgin emdelip shyqqaly jatyrmyn. Emniń barlyq kezeńinde ortalyq qyzmetkerleri úlken qamqorlyq kórsetti. Dári-dármekter men qajettiniń bárimen qamtamasyz etti. Dáriler tiimdilik kórsetip, alǵashqy kúnderden-aq nátije berdi. Jaǵdaiym tek jaqsara tústi. Tamaǵy da óte jaqsy. Barlyǵyna, medbikelerge, dárigerlerge, ujymnyń barlyǵyna kóp rahmet», – deidi ol.
27 shildedegi jaǵdai boiynsha, Nur-Sultanda koronavirýs juqtyrǵan 10 070 naýqas tirkeldi. Olardyń 6 766-sy emdelip shyqty.
Olga Komarovanyń aitýynsha, dezinfektsiiadan keiin psihikalyq densaýlyq ortalyǵy jaqynda óziniń burynǵy profiline sáikes jumysyn qaita bastaidy.
