Búgin Nur-Sultan qalasyndaǵy «Astana EKSPO -2017» halyqaralyq kórme nysandary aýmaǵynda BAQ ókilderine arnalǵan baspasóz týry uiymdastyryldy, dep habarlaidy QazAqparat.
«Astana EKSPO -2017» halyqaralyq kórme nysandaryn tiimdi paidalaný úshin álem astanalarynyń tájiribesi qaraldy. Iaǵni, bizde bar resýrstar men múmkindikter saralandy. Búginde EXPO iskerlik ortalyǵy 25 ga jer aýmaǵyn qamtidy jáne onda 15 nysan ornalasqan. Kórmeden keiin paidalaný tujyrymdamasyn iske asyrý sheńberinde nysandardyń aýdany 75 myń sharty metrge ulǵaityldy, olardyń tolymdylyǵy búgingi kúni 98%-ǵa jetti, - dedi «QazExpoCongress» ulttyq kompaniiasy AQ basqarma tóraǵasy Allen Sháijúnisov baspasóz týrynda.
EXPO iskerlik ortalyǵy 2023 jyldan bastap tolyqtai ózin-ózi qamtamasyz etedi dep josparlanyp otyr.
«QazExpoCongress» ulttyq kompaniiasy basshysynyń aitýynsha, iskerlik ortalyqtaǵy mańyzdy nysandarynyń biri, týristerdi tartatyn orynǵa ainalǵan – «NUR ALEM» bolashaq energiiasy murajaiy.
«2018 jyldan bastap murajaida elimizdiń barlyq óńirleriniń qatysýymen 150-den astam oiyn-saýyq jáne bilim berý is-sharalary ótip, odan bólek, 500-den astam Kids&Students Future Energy ashyq sabaqtary uiymdastyryldy. Kórmeden keiingi kezeńde NUR ALEM-ge 800 myńnan astam adam keldi. Sheteldik týristerdiń basym bóligi TMD elderi, Qytai, AQSh, Germaniia, Italiia, Úndistan jáne taǵy basqa elderden keldi», - deidi ol.
Odan bólek, ulttyq kompaniia saýda infraqurylymyn qurý boiynsha jumys júrgizýde. Onyń sheńberinde 4 transshekaralyq hab qurý josparlanyp otyr.
Olardy damytýdyń negizgi baǵyttary: óndiristik kooperatsiia, AÓK ónimderin qaita óńdeý jáne saqtaý, tasymaldaý, transshekaralyq saýda, sondai-aq qoimalaý jáne saqtaý.
Sondai-aq, baspasóz týry barysynda biyl 1 qańtardan bastap Máskeýdegi «Qazaqstan» saýda-kórme ortalyǵy «QazExpoCongress» ulttyq kompaniianyń balansyna qabyldanǵany aityldy.
Ondaǵy maqsat - qazaqstandyq taýarlardy Resei naryǵynda ilgeriletý.
