Astanada birneshe kúnnen beri izdestirilip jatqan oqýshy bala óli kúiinde tabyldy. Bul týraly QR Ishki ister ministrligi Tótenshe jaǵdailar komitetiniń resmi ókili Nursultan Nurahmetov aitty, dep habarlaidy QazAqparat tilshisi.
«19 aqpan kúni saǵat 16:53-te Astananyń Temirjol turǵyn alabynda Ortalyq óńirlik aeromobildi shuǵyl-qutqarý jasaǵynyń qutqarýshylary 2006 jyly týǵan balany izdestirý jumystaryn júrgizdi. Ol 16 aqpanda úiinen shyǵyp ketip, qaita oralmaǵan. Saǵat 23:40-ta volonterlar ashyq jatqan káriz qudyqtarynyń birinen joǵalǵan balanyń denesin tapty. Qutqarýshylar máiitti alyp shyqty», - dedi resmi ókil.
Astana qalalyq Politsiia departamentiniń baspasóz qyzmetinen málim etkendei, oqiǵa boiynsha tergeý bastaldy. Sot-meditsinalyq saraptama taǵaiyndaldy. Baqdáýlet Ómirhannyń denesinde kózge kórinetin zorlyq-zombylyq belgileri baiqalmaǵan.
«Balanyń joǵalý sebebin anyqtaý jáne onyń ornalasý jerin anyqtaý maqsatynda shuǵyl-izdestirý toby quryldy. Oǵan politseiler, áskeri qyzmetshiler, tótenshe jaǵdailar qyzmetkerleri endi. Sondai-aq izdestirý jumystaryna eriktiler qosyldy. Áskeri qyzmetshiler men volonterlar kenttegi (Temirjol turǵyn alaby) ormandy alqaptardy, qaraýsyz qalǵan jer úilerdi, ashyq alańdardy, temirjol ótkelderin, káriz qudyqtaryn, sondai-aq tehnikanyń kómegimen trassalar boiyn tintip shyqty», - dedi Astana qalalyq Politsiia departamentinen.
Eske salaiyq, elordada osyǵan uqsas oqiǵa birneshe kún buryn ǵana bolǵan edi. 15 aqpan kúni anasymen birge serýendep júrgen 5 jasar bala ashyq turǵan qudyqqa qulap ketti. Oqiǵa Qarasai batyr kóshesi boiynda boldy. Abyroi bolǵanda, bala din aman qutqaryldy. Qutqarýshylar kelgenshe tereńdigi 2 metr qudyqqa №39 mekteptiń 10-synyp oqýshysy túsip, baldyrǵandy alyp shyqty.
Budan bólek, ótken jyldyń 26 qarashasy kúni 14 jastaǵy qyz káriz qudyǵyna qulap, mert boldy. Osy oqiǵadan keiin shahar basshysy Baqyt Sultanov qudyqtardy kúndelikti tekserýdi tapsyrdy.
Aita keteiik, astanalyqtar ashyq qudyqtar men olardyń qaqpaqtarynyń synǵany týraly aqparatty iKomek ortalyǵyna habarlai alady (109 nómirine qońyraý shalý (qalalyq jáne uialy telefonnan qońyraý shalý - tegin); Telegram-daǵy: astanaikomek109_bot chat-botyna jiberý, ákimdiktiń astana.gov.kz saityna joldaý).
