Nur-Sultan qalasynyń ákimi Altai Kólginov Instagram paraqshasynda jastarǵa arnalǵan "Elorda Jastary" arnaiy turǵyn úi baǵdarlamasynyń iske qosylǵany týraly málim etti, dep habarlaidy "Ult aqparat" qala ákimdiginiń resmi saityna silteme jasap.
«Qurmetti qala turǵyndary! Sizderge aitar qýanyshty habarym bar!
Elordada jastarǵa arnalǵan «Elorda Jastary» arnaiy turǵyn úi baǵdarlamasyn iske qosamyz. Jeńildetilgen áleýmettik nesielendirý turǵyn úi baǵdarlamasy elordanyń jas mamandaryna arnalǵan. Mysaly, Nur-Sultan qalasynda «jetim balalar» sanaty boiynsha turǵyn úige kezekte turǵan densaýlyq saqtaý, bilim berý, áleýmettik, mádeniet jáne sport salalary, joǵary oqý oryndary men ǴZI, politsiia departamenti, TJD qyzmetkerleri, kommýnaldyq kásiporyndardyń beiindi qyzmetkerleri jáne t.b. arnalǵan.
Jastarǵa arnalǵan turǵyn úi baǵdarlamasyn iske asyrýǵa bizge Otbasy banki men 2021-2023 jyldarǵa arnalǵan «Elorda Jastary» baǵdarlamasy kómektesedi. «Elorda Jastary» jastarǵa, sonyń ishinde turǵyn úi jelisi boiynsha tolyq qoldaý kórsetýge baǵyttalǵan. Sonymen qatar, «Elorda Jastary» baǵdarlamasynda bilim berý, jumyspen qamtý, bos ýaqytty paidaly ótkizý jáne t.b. baǵyttar bar.
Jastarǵa arnalǵan turǵyn úi baǵdarlamasyna 35 jasqa deiingi (35 jasty qosa alǵanda, jubaiynyń/zaiybynyń jasy mańyzdy emes) jastar qatysa alady. Oǵan mynandai talaptar kiredi: qalada keminde bir jyl tirkeýli, Otbasy bankte jinaq shoty bar, baǵdarlama úmitkeriniń jeke turǵyn úii bolmaýy tiis (sońǵy 5 jyl ishinde), resmi jumys ótili bir jyldan kem emes.
Osylaisha, atalǵan turǵyn úi baǵdarlamasyna qatysýshy turǵyn úi satyp alýǵa 18 mln teńgege deiin qaryz ala alady. (jyldyq 5% jeńildikpen). Satyp alynatyn turǵyn úidiń quny - shekteýsiz. Qaryz 25 jylǵa deiingi merzimge beriledi.
Ótinimderdi qabyldaý kelesi dúisenbide - 14 qazanda bastalady, qatysu.zhilfond.kz portalynda júzege asyrylady. Qatysýshylardyń sanattary, turǵyn úi alý talaptary men algoritmi boiynsha qosymsha aqparatpen Nur-Sultan qalasy ákimdiginiń «Turǵyn úi qory» KMM saitynda (zhilfond.kz) tanysýǵa bolady. Ótinishterdi qabyldaý merzimi aiaqtalǵannan keiin qatysýshylardy irikteý baldyq júiege sáikes bastalady.
Sonymen qatar, biyl Elbasynyń bastamasymen qolǵa alynǵan «Jumys isteitin jastarǵa jalǵa beriletin turǵyn úi» baǵdarlamasyn jalǵastyramyz. Osy baǵdarlama aiasynda bir myńnan astam jas baspanaly bolady.
Memleket basshysy halyqqa Joldaýynda azamattardyń qoljetimdi jeńildikti turǵyn úi satyp alýyna jaǵdai jasaý máselesine nazar aýdardy», – dep jazdy elorda ákimi.
