Elordada jalǵan anyqtamalar satqan meditsinalyq ortalyqtardyń eki basshysy ustaldy, - dep habarlaidy Polisia.kz portaly.
Klientter kólik quraldaryn basqarýǵa júrgizýshi kýáligin alý úshin meditsinalyq anyqtamalarǵa tapsyrys bergen. Is-sharalar kesheni barysynda Astana qalasynyń politseileri aldyn ala sóz bailasý boiynsha jalǵan meditsinalyq anyqtamalardy ótkizý arnasyn uiymdastyrǵan JShS-nyń eki basshysyn ustady. Aqshalai qarajatqa olar meditsinalyq uiymǵa is júzinde barmai-aq ýaqytsha eńbekke jaramsyzdyq paraqtaryn, densaýlyq pasporttaryn, sanitarlyq kitapshalardy, №086, 075 nysanyndaǵy anyqtamalardy jáne ózge de meditsinalyq qujattardy daiyndaǵan.
Tergeý-jedel is-sharalar keshenin ótkizý kezinde Astana qalasy PD Kriminaldyq politsiia basqarmasynyń qyzmetkerleri Táýelsizdik dańǵyly boiyndaǵy meditsinalyq ortalyqtyń 33 jastaǵy basshysyn ustady. Tintý barysynda qolma-qol aqsha, eltańbalyq mórler, meditsinalyq mórtabandar, meditsinalyq anyqtamalardyń úzbeli túbirtek bailamdary, tirkeý jýrnaldary, meditsinalyq kitapshalar, toltyrylǵan jáne mór qoiylǵan eńbekke jaramsyzdyq paraqtary tárkilendi.
Sondai-aq, Áýezov kóshesinde ornalasqan meditsinalyq ortalyqtyń taǵy bir 33 jastaǵy basshysy ustaldy. Tintý barysynda meditsinalyq kitapshalar, eńbekke jaramsyzdyq paraqtary, mórler tárkilendi. Klientterdiń jumysqa ornalasý, kólik quraldaryn basqarý úshin júrgizýshi kýáligin alý jáne taǵy basqa qajetti meditsinalyq anyqtamalarǵa tapsyrys bergeni anyqtaldy.
Atalǵan derek boiynsha jalǵan qujattardy daiyndaǵany jáne ótkizgeni úshin QR QK-niń 385-baby (Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daiyndaý nemese ótkizý) boiynsha qylmystyq is qozǵaldy. Tergeý amaldary júrgizilip jatyr.
