Elordanyń tórt turǵyny bank kartalarynan aqsha jymqyrylǵany týraly politsiiaǵa aryzdanǵan, dep habarlaidy "Ult aqparat" Nur-Sultan qalalyq Politsiia departamentiniń baspasóz qyzmetine silteme jasap.
Qazirgi kezde aqparattyq júiege zańsyz kirý jolymen urlyq jasaýdyń barlyq faktileri boiynsha QR QK 188-babyna sáikes, sotqa deiingi tergep-tekserý júrgizilýde.
Jábirlenýshilerdiń aitýynsha, 2020 jyly nesie alý úshin bankterge barǵan. Alaida, túrli sebeptermen bankter olarǵa nesie berýden bas tartqan. Nesieni alý maqsatynda azamattar internet-saittar arqyly ózderiniń qarjylyq problemalaryn sheshýge tyrysqan, biraq alaiaqqa tap bolǵan. Atalǵan saittarda olarǵa jeke derekterin, JSN, bank kartasyn, SVV-kodyn kórsete otyryp, anketa toltyrý usynylǵan.
Barlyq rekvizitterdi toltyrǵannan keiin jábirlenýshiler kelisim úshin aqparattyń óńdelýin kútken. Biraq olar saittyń jalǵan ekenin jáne nesie berýge eshqandai qatysy joq ekendiginen kúdiktenbegen. Azamattardyń barlyq derbes derekteri alaiaqtyń qolyna túskennen keiin olar internet arqyly bank kartalarynan aqsha jymqyrǵan.
Jedel-izdestirý is-sharalaryn júrgizý kezinde buryn osy sekildi qylmystary úshin jaýapqa tartylǵan qalanyń 24 jastaǵy turǵyny ustaldy.
Politsiia departamenti elorda turǵyndaryna bank kartalarynyń rekvizitterin, SVV- kodyn, SMS-parolderdi bóten adamdarǵa bermeýdi usynady. Bank qyzmetkerleri eshqashan qońyraý shalyp, derbes derekterdi suramaidy. Osy sekildi jaǵdailarda tez arada bankke habarlasyp, kartany buǵattaý kerek. Sodan keiin politsiiaǵa habarlaý qajet.
