Elorda aýmaǵynda túngi ýaqytta jasóspirim balalar júrgen dámhana anyqtaldy, dep habarlaidy "Ult aqparat" qalalyq politsiia departamentiniń baspasóz qyzmetine silteme jasap.
«5 tamyzda túngi saǵat 3-te Shevchenko kóshesiniń boiyndaǵy dámhanada bas sanitarlyq dáriger qaýlysynyń buzylý faktisi tirkeldi. Karantindik sharalarǵa qaramastan dámhana jumys istep turǵan. Onyń ishinde 26 klientke qyzmet kórsetilip jatqan, olardyń arasynda bes jasóspirim bolǵany anyqtaldy», - delingen habarlamada.
Jasóspirimderdiń zańdy ókilderi QR Ákimshilik kodeksiniń 442-baby 1-bóligi boiynsha ákimshilik jaýapqa tartyldy. Dámhana iesi de jaýapqa tartylyp, 10 AEK kóleminde (27780 teńge) aiyppul tóleidi. Buǵan qosa, dámhana iesine qatysty materialdar Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
Ótken táýlikte Nur-Sultan qalasynyń politseileri, epidemiolog, eriktiler men jergilikti atqarý organdarynyń ókilderinen quralǵan mobildi top 11 ret karantin sharasynyń buzylýyn anyqtady. Qalalyq politsiia departamenti azamattarǵa karantin sharalaryn buzǵany úshin jaýapqa tartylatynyn eskertedi jáne sanitarlyq normalardy saqtaýǵa shaqyrady.
