Foto: Polisia.kz
Astanada qalalyq prokýratýra men Politsiia departamentiniń úilestirýimen «Zań jáne tártip» qaǵidaty aiasynda esirtki qylmysyna qarsy ailyq jalǵasyp jatyr. Is-shara barysynda quqyq qorǵaý organdary óz úiinde esirtki ósirip, ony taratýmen ainalysqan er adamdy anyqtady, dep habarlaidy elorda ákimdiginiń resmi saity.
Jedel is-shara kezinde politseiler er adamnyń óz úiinde marihýana ósirgenin anyqtady. Onyń bir bólmesinde shaǵyn jylyjai jabdyqtalǵany belgili boldy.
Tártip saqshylary oqiǵa ornynan 15 qumyraǵa egilgen tyiym salynǵan ósimdikter men olardy ósirýge arnalǵan qajetti qural-jabdyqtardy tárkiledi.
Tergeý barysynda er adamnyń bul iske muqiiat daiyndalǵany anyqtaldy – arnaiy sham ornatyp, jeldetkish júrgizip, qajetti temperatýralyq rejimdi saqtap otyrǵan.
Osymen shektelmei, ol sintetikalyq esirtkini satýmen de ainalysqan. Ony jasyryp ketý barysynda avtoturaqta ustady. Tintý barysynda onyń úiinen, kóliginen jáne jeke zattarynan quramynda Alpha PVP bar 40-tan astam oram tabylyp, tárkilendi.
Kúdikti ýaqytsha ustaý izoliatoryna qamaýǵa alyndy, tergeý amaldary júrgizilip jatyr.
Aita ketý kerek, quramynda esirtki zattary bar ósimdikterdi ósirgeni úshin de, olardy ótkizgeni úshin de qatań qylmystyq jaýapkershilik qarastyrylǵan. Quqyq qorǵaý organdary azamattardy kez kelgen zańsyz esirtki ainalymy faktileri týraly 102 nómirine habarlaýǵa shaqyrady.
Elordada ótip jatqan esirtkige qarsy mundai sharalar halyqtyń habardarlyǵyn arttyrýǵa, politsiia men qoǵam arasyndaǵy senimdi nyǵaitýǵa, sondai-aq esirtki qylmysyna jáne ózge de qoǵamdyq qaýipsizdikke qater tóndiretin áreketterge birlesip qarsy turýǵa zor úles qosady.
«Zań jáne tártip» qaǵidaty aiasynda júzege asyrylyp jatqan keshendi sharalar birlesken reidterdi, oqý oryndarynda profilaktikalyq túsindirý júrgizýdi, sondai-aq tyiym salynǵan zattardy taratatyn internet-resýrstardy anyqtap, joiýdy qamtidy.
