Mádeniet jáne sport ministrligine baǵynysty Q.Muńaitpasuly atyndaǵy Olimpiada rezerviniń mamandandyrylǵan Respýblikalyq mektep-internat-kolledjinde dańqty palýan, kúsh atasy Qajymuqan Muńaitpasuly eskertkishiniń ashylýy ótti. Sonymen qatar Qajymuqan Muńaitpasulynyń 150 jyldyǵyna orai «Jas Batyr» sport keshenine «Qajymuqan» ataýy berildi, dep habarlaidy "Ult aqparat" vedomstvonyń baspasóz qyzmetine silteme jasap.
Saltanatty is-sharaǵa Mádeniet jáne sport ministri Aqtoty Raiymqulova, Nur-Sultan qalasy ákiminiń orynbasary Ermek Qizatov, grek-rim kúresinen eki dúrkin Olimpiada júldegeri Dáýlet Turlyhanov, Parlament Májilisiniń depýtaty Baqytbek Smaǵul men birqatar sport jáne qoǵam qairatkeri qatysty.
Eskertkishtiń ashylýynda sóz alǵan Aqtoty Raiymqulova kúsh atasy Qajymuqan Muńaitpasulynyń 150 jyldyǵyn atap ótýge elimizdiń barlyq óńiri bir kisidei jumylyp, erekshe atsalysyp jatqanyn atap ótti.
«Qajymuqan Muńaitpasuly – qazaq halqynyń tarihyndaǵy tuńǵysh kásipqoi balýan. Ol búkil ǵumyryn kúres ónerine arnap, elimizdi ózge jurtqa pash etken. Talai beldesýde atyshýly qarsylasynan ailasyn asyryp, kózi tirisinde erligi ańyzǵa ainalyp úlgerdi. Orasan kúshtiń iesi bolǵan balýan babamyz, kúrestiń birneshe túrinen qazaqtan shyqqan tuńǵysh álem chempiony atandy.
Jyl basynda Qajymuqan Muńaitpasulynyń esimin ulyqtaý, máńgilikke este qaldyrý maqsatynda arnaiy Jalpyrespýblikalyq is-sharalar jospary əzirlendi. Keshendi josparǵa səikes kóptegen mádeni, sporttyq-buqaralyq, aqparattyq-imidjdik is-shara ótkizilip keledi. Bul qatarda arnaiy poshta markalary shyǵarylǵanyn, «Qajymuqan» kórkem filminiń túsirilgenin aitýǵa bolady. Sonymen qatar elimizdiń túkpir-túkpirinde marafondar, dóńgelek ústelder, taqyryptyq ashyq sabaqtar, birneshe halyqaralyq konferentsiia, týrnirler men basqa da is-sharalar ótkizildi.
Búgin er esimin ulyqtaýǵa arnalǵan sondai is-sharanyń birinde bas qosyp turmyz. Elorda tórinde kúsh atasy Qajymuqan babamyzdyń eskertkishin saltanatty túrde ashqaly jatyrmyz. Sizdermen birge osy abyroily is-sharanyń basy-qasynda bolý men úshin zor mártebe dep sanaimyn. Sonymen qatar qalamyzdaǵy «Jas batyr» sport kesheni budan bylai «Qajymuqan» sport kesheni dep atalady. Bul is-sharalar balýanǵa kórsetilgen taǵzymnyń shaǵyn da bolsa, mańyzdy kórinisi. Aldaǵy ýaqytta da ańyz adamnyń rýhyn asqaqtatyp, erligin keler urpaqqa jetkizý bizdiń maqsatymyz bolyp qala beredi»,-dedi ministr.
Aita keteiik, eskertkishtiń jalpy biiktigi 5,7 metr (tuǵyry - 2,2 metr, músin 3,5 metr). Avtorlary – Jalyn Baýyrqan, Bolatbek Salaev.
Tarihi derekterge súiensek Qajymuqan Muńaitpasuly 1871 jyly 7 sáýirde sol kezdegi Aqmola ýezi, Saryterek bolysyna qarasty Jádik degen jerde dúniege kelgen. Dúniejúziniń chempiondary Ivan Poddýbnyi, Ivan Shemiakin, Aleks Aberg, Ivan Zaikin, Georg Lýrih, Pol Pons syndy palýandarmen kúresken.
