Elorda aýmaǵynda «Stop-trafik» jedel aldyn alý sharasy ótkizilip jatyr, dep habarlaidy "Ult aqparat".
Nur-Sultan qalalyq Politsiia departamentiniń qyzmetkerleri SPID ortalyǵymen birlesip, intimdik jáne bodi-massaj qyzmetin kórsetetin tulǵalardy anyqtaý boiynsha aldyn alý-reidtik sharasyn adam saýdasymen kúres maqsatynda ótkizip jatyr. Reid barysynda jeńil júristi qyzdy 8 myń teńge aqshalai syiaqyǵa klinetke jetkizip bergen áiel ustaldy. Ol bul áreketi úshin QR Qylmystyq kodeksiniń 309-baby 1-bóligimen jaýap beredi.
Sonymen qatar «Stop-trafik» sharasy barysynda Balqantaý kóshesinde ornalasqan saýnanyń ákimshisi ustaldy. Ol klientke 50 myń teńge syiaqyǵa intimdik qyzmet kórsetetin qyzdardy jetkizip bergen. Munan bólek, páterler men kottedjderde massaj jasaityn SPA-salondar anyqtaldy. Salondar bodi-massaj atyn jamylyp, intimdik qyzmet kórsetip kelgen. Jeńil júristi qyzdardyń arasynda kámeletke tolmaǵandar da bar. 30 myń teńgege intimdik qyzmet kórsetken jigitter de ustaldy.
«Jedel aldyn alý sharasyn ótkizý nátijesinde politsiiaǵa intim jáne bodi-massaj qyzmetin kórsetetin 69 qyz ben 10 jigit, saýnalar men SPA-salondardyń 11 ákimshisi jetkizildi. Páterleri men kottejderdi jalǵa bergen menshik ieleri aiyppul túrindegi jazaǵa tartyldy», - dep atap ótedi departamentten.
