Nur-Sultan qalasy ákimdigi Tuńǵysh Prezidenttiń «Bes áleýmettik bastamasy» aiasynda gaz taratý jelileriniń qurylysyn bastady. Bul týraly Ortalyq kommýnikatsiialar qyzmetinde ótken brifingte qala ákiminiń orynbasary Ermek Qizatov aitty, dep habarlaidy QazAqparat.
«Gazdandyrý jumysy eki baǵytta júzege asady. Birinshi baǵyt boiynsha qalalyq óndiris jáne turǵyn alaptaryn gazdandyrý jelisi salynady, ekinshisi - JEO-1 jáne JEO-2 jylý ortalyqtaryna gaz berý», - deidi Ermek Qizatov.
Onyń aitýynsha, qurylys jumystary 3 kezeńge bólingen.
«Birinshi kezeńde, iaǵni 2019-2020 jyldar aralyǵynda «Kóktal-1», «Kóktal-2», Jeleznodorojnyi, Ońtústik-Shyǵys turǵyn alaptary men Promyshlennyi kentine gaz tartylady. Bul jumystar kelesi jyly aiaqtalatynyna senimdimiz», - deidi ákim orynbasary.
Onyń aitýynsha, qurylystyń ekinshi kezeńi - 2020-2023 jyldar aralyǵynda júrgiziledi. Sonyń aiasynda Internatsionalnyi, Kúigenjar, Telman turǵyn aýdandary men Prigorodnyi, Garden Village, Famili Village qalashyqtaryna gaz tartylady.
«Úshinshi kezeń 2020-2023 jyly júzege asyrylyp, Ilinka, Shubar, Óndiris aýdandaryna gaz qubyry tartylady», - deidi ol.
