Nur-Sultan qalasynyń esirtki qylmysyna qarsy bólimshesiniń qyzmetkerleri esirtki satýmen ainalysqan otbasyny anyqtady, dep habarlaidy "Ult aqparat".
Esirtki satatyn adamdardy anyqtaý boiynsha arnaiy operatsiiany politsiia osy jyldyń 6 qarashasynda ótkizgen. Arnaiy operatsiia barysynda geroin satý kezinde 37 jastaǵy er adam men onymen birge turatyn 49 jastaǵy áiel ustalǵan.
Politsiia qyzmetkerleri ustalǵandar turǵylyqty jerinde esirtki satatyn saýda núktesin uiymdastyrǵanyn anyqtaǵan. Erli-zaiyptylardyń páterin tekserý kezinde olardan - esirtki qabattary bar elektrondy tarazy, 1 million teńgeden astam somadaǵy qolma-qol aqsha, sondai-aq «geroin» salynǵan 2 polietilen paket jáne daiyndalǵan esirtki salynǵan oralǵan 25 qaǵaz paket tabylǵan.
Zańsyz biznestegi «seriktesterdiń» róli naqty bólingen kórinedi. Al esirtki saýdasynan túsken aqsha jalpy otbasylyq biýdjetke túsip otyrǵan.
«Áiel jetkizýshilermen bailanysty ustap, esirtkini býyp-túiip, qarajattyń bólinýine jaýapty bolǵan. Al onyń kúieýi tikelei esirtki satýmen ainalysyp kelgen», - deidi Nur-Sultan qalalyq politsiia bólimi politsiia bastyǵynyń orynbasary politsiia polkovnigi Erlan Ákbarov.
Áieldiń buǵan deiin de esirtki satqany úshin eki ret sottalǵany belgili bolyp otyr. Jedel sharalardyń nátijesinde esirtkini tutyný úshin zańsyz ainalymnan shamamen 400 gramm geroin alynǵan. Onyń baǵasy «qara naryqta» aqshalai túrde bólip satan jaǵdaida 6 million teńgeden asady.
Ustalǵan adamdar qazir Qylmystyq kodekstiń 297-baby 4-bóligi boiynsha qylmystyq jaýapkershilikke tartylǵan. Kinási dáleldengen jaǵdaida olar 7 jyldan 25 jylǵa deiin bas bostandyǵynan aiyrylýy múmkin.
