Foto: Gov.kz
Astanada «Daryn» memlekettik jastar syilyǵynyń laýreattaryn marapattaý rásimi ótti. Syilyq mádeniet, ǵylym, media jáne sport salasynda joǵary jetistikterge jetken 20 jas darynǵa tabystaldy, dep habarlaidy Ult.kz.
Olardyń qatarynda halyqaralyq jáne respýblikalyq konkýrstar, festivalder men kórmelerdiń laýreattary, respýblikalyq jáne halyqaralyq deńgeidegi sport jarystarynyń júldegerleri men jeńimpazdary, qoǵamnyń damýyna úles qosyp júrgen jastar bar.
QR Mádeniet jáne aqparat ministri Aida Balaeva quttyqtaý sózinde jastar saiasaty salasynda jyl sanap jańa býyndy qoldaýǵa baǵyttalǵan sharalar men jobalar artyp kele jatqanyn atap ótti. Prezident bastamasy arqyly joǵary bilimniń qoljetimdiligi artyp, jas ǵalymdardy qoldaýǵa arnalǵan grant baǵdarlamalary kóbeidi, eńbek naryǵynda jas mamandardyń múmkindikterin arttyratyn jańa jobalar iske qosyldy.
Kreativti indýstriia, tsifrlyq ekonomika, kásipkerlik salasynda jastarǵa jol ashatyn bastamalar da memleket tarapynan qoldaý taýyp otyr.
Laýreattar «Ǵylym», «Estrada», «Klassikalyq mýzyka», «Halyq shyǵarmashylyǵy», «Sport», «Dizain jáne beineleý óneri», «Jýrnalistika», «Qoǵamdyq qyzmet», «Teatr jáne kino», «Ádebiet» nominatsiialary boiynsha anyqtaldy.
2025 jylǵy jeńimpazdardyń qatarynda tanymal qazaqstandyq ánshi Eńlik Qurarbek (Yenlik), «Slavian bazary-2024» halyqaralyq vokaldyq baiqaýynyń bas júldegeri Ernazar Juban, «Qairat» fýtbol klýbynyń shabýylshysy Dastan Sátpaev bar.
«Daryn» memlekettik jastar syilyǵy jyl saiyn talantty jastardy memlekettik deńgeide qoldaý maqsatynda tabystalady. Syilyq ǵylymi, shyǵarmashylyq, qoǵamdyq qyzmettegi jetistikter men joǵary sporttyq nátijeler úshin beriledi.
30 jyldan astam ýaqyt ishinde bul syilyqty 360-tan asa jas qazaqstandyq ielengen. Osyǵan deiin Nurlan Ónerbaev, Baqtiiar Artaev, Serik Sápiev, Daniiar Eleýsinov, Ilia Ilin, Olga Shishigina, Denis Ten, Qydyráli Bolmanov, «MýzART», «Báiterek» toptary, Serik Ibragimov, Áli Oqapov, Qairat Nurtas, Dimash Qudaibergen jáne taǵy basqa kóptegen ónerpazdar men sportshylar marapattalǵan.
