Nur-Sultan qalasynda búginge deiin 1640 adamǵa koronavirýsqa qarsy vaktsina salyndy. Mundai kórsetkishti Nur-Sultan qalalyq №2 emhanasynyń direktory Lázzat Rúspekova jariia etti, dep habarlaidy "Ult aqparat".
«Nur-Sultan qalasynyń qoǵamdyq densaýlyq saqtaý basqarmasy basshysynyń buiryǵymen elordada birinshi bolyp vaktsina egetin bes emhana bekitildi. Osy emhanalarda eń aldymen virýsty juqtyrý qaýpi joǵary azamattarǵa salyna bastady. Ekpe jumystaryn bastamas buryn bes emhanada daiyndyq jáne uiymdastyrý jumystary júrgizilgen. Atap aitqanda vaktsinany tasymaldaýǵa arnalǵan termokonteinerler alyndy, oqytý jumystary ótkizilip, sanitarlyq-epidemiologiialyq sala qyzmetkerlerimen qatar meditsina qyzmetkerleri attestattaýdan ótti», - dedi Lázzat Rúspekova ortalyq kommýnikatsiialar qyzmetiniń alańynda ótip jatqan baspasóz máslihatynda.
Onyń aitýynsha, elordada qazirge deiin 1640 adamǵa koronavirýsqa qarsy vaktsina salynyp qoiǵan.
«Vaktsinanyń bir flakony bes adamǵa jetedi. Osy vaktsinany salý kezinde ýaqyt boiynsha aralyq tártibi qatań saqtaldy. Vaktsina salynǵan adam alǵashqy 30 minýtta baqylaýda bolady», - dedi ol.
