Elordalyq politsiia qyzmetkerleri keshki ýaqytta 18 jastaǵy qyzǵa shabýyl jasaǵan 60 jastaǵy er adamdy izin sýytpai ustady, dep habarlaidy "Ult aqparat" qalalyq PD baspasóz qyzmetine silteme jasap.
Jábirlenýshiniń aitýynsha oqiǵa saǵat 22.00-de bolǵan. Belgisiz er adam artynan júgirip kelip, jerge qulatpaqshy bolǵan jáne qolynan uialy telefonyn tartyp alǵysy kelgen. Kómek surap aiqailaǵan daýys ótip jatqan adamdardyń nazaryn aýdarǵan. Qylmysker qoryqqannan oqiǵa ornynan qashyp ketken.
Tonaý jasaýǵa oqtalǵany týraly habarlamany alǵannan keiin politsiia qyzmetkerleri oqiǵa ornyna tez arada bardy. Jedel izdestirý barysynda kúdikti ustaldy.
Japa shekken boijetken politsiiaǵa jetkizilgen kúdiktini tanydy. Tergeý júrgizý barysynda kúdiktiniń buryn eki áiel adamǵa shabýyl jasap, oqiǵa ornynan qashyp ketken tonaýshyǵa uqsaityny anyqtaldy.
Jábirlenýshilerdiń biriniń aitýynsha, keshke jaqyn úiine kele jatqanda belgisiz adam basynan birneshe ret uryp, qolynan noýtbýgyn, jeke zattary salynǵan sómkesin, uialy telefonyn tartyp alǵan. Sodan soń belgisiz baǵytqa qashyp ketken. Ekinshi jábirlenýshiniń aitýynsha, úiine qaityp kele jatqanda qarsy kele jatqan er adam qasynan ótip ketip, kenetten artqa burylyp, uialy telefonyn tartyp alǵan. Ustalǵan adam Ózbekstan Respýblikasynyń azamaty bolyp shyqty. Jasaǵan is-áreketin moiyndady.
Áielderdiń biriniń noýtbýgyn jáne jeke zattaryn jerge kómip, tyǵyp qoiǵan.
Ustalǵan adam Ýaqytsha ustaý izoliatoryna qamaldy. Qylmystyq is qozǵaldy. Tergeý amaldary júrgizilýde.
