Biyl elordada birneshe kóshe, mektep jáne teatr ataýy ózgeredi. Bul týraly Nur-Sultan qalasy Tilderdi damytý jáne arhiv isi basqarmasy basshysynyń orynbasary Sáken Esirkep málim etti, dep habarlaidy QazAqparat tilshisi.
«Biyl elordada 46 kóshe, 8 mektep jáne 1 teatrdyń ataýyn ózgertý josparlanyp otyr. Jalpy olardyń ataýyn ózgertý usynysy bizge jeke azamattardan, qoǵamdyq birlestikter jáne arnaiy mekemelerden kelip túsedi. Ol usynystardy jinaqtap onomastikalyq komissiianyń otyrysynda talqylaǵa salamyz. Iaǵni kimnen qandai usynys kelip tústi, qai kóshege qandai ataý beremiz degen sekildi. Sonymen qatar biz aýdandyq ákimdiktermen tyǵyz jumys isteimiz. Ózińiz biletindei elordada qurylys qarqyny joǵary, jyl sanap jańa turǵyn úi keshenderi men alaptary paida bolyp jatyr, olarǵa ataý berýmen biz ainalysamyz», - dedi S. Esirkep.
Onyń aitýynsha, onomastikalyq komissiia quramynda sala mamandary men qatar tanymal qoǵam qairatkerleri bar.
«Ataý berý jáne ony ózgertý máselesi onomastikalyq komissiia otyrysynan keiin qoǵamdyq talqylaýǵa túsedi. Ol úshin kóshe nemese belgili bir mekemege ataý berý týraly usynys NQA (normativtik-quqyqtyq aktiler) portalyna jariialanady. Sol jerde ár azamattyq ózindik pikirin bildire alady. Árine qoǵam bolǵan soń pikir ártúrli, bireý qoldasa, ekinshisi qarsy shyǵady. 10 kún boiy qoǵamdyq talqylaýda aitylǵan usynystar men syn-pikirler qalalyq máslihattyń jalpy otyrysynda qaralady. Sodan soń respýblikalyq onomastikalyq komissiia qaraidy, ol ministrlik deńgeiinde ótedi. Eger respýblikalyq deńgeide qoldaý tapsa, ol qalalyq máslihat sheshimi jáne ákimdik qaýlysymen bekitilip Ádilet departamentine usynylady. Sodan soń ǵana ataý berý nemese ózgertý kúshine enedi», - deidi ol.
Sondai-aq, basqarma basshysynyń orynbasary elordadaǵy ataýlardyń 90% qazaqsha ekenin alǵa tartty.
«Táýelsizdik alǵaly elimiz boiynsha kóp jańa ataý qoiylǵan ol Nur-Sultan qalasy. Jalpy kóshe nemese belgili bir uiymǵa at berý birneshe sanatqa bólinedi. Mysaly, qazaq batyrlarynyń, han, sultan, bilerdiń nemese ǵalymdardyń esimin berý. Odan bólek, jer-sý ataýlary da nazardan tys qalmaidy», - dedi ol.
Biyl elordalyq onomastika komissiiasynyń otyrysynda qaladaǵy keibir bilim berý mekemelerine B.Momyshuly, S.Sádýaqasov, M.Maqataev, M.Shoqai, N.Tórequlov, Q.Kemeńgeruly, I.Esenberlin, Q.Muhamedhanov, Q.Sátbaevtyń esimderin, bir teatrǵa Á.Mámbetovtiń, sondai-aq birqatar kóshege R.Baǵlanova, K.Myrzabekov, Ánet baba, H.Dospanova, E.Serkebaev, J.Moldaǵaliev, S.Zimanov, B.Qosshyǵulov, Á.Baijanbaev, U.Qulymbetov, A.Bólekpaev, Berdiqoja batyr, M.Saǵdiev, K.Orazalin, Ý.Halfin, N.Nurmaqov, R.Berdibai syndy tulǵalardyń esimderin berý týraly sheshim qabyldandy.
