Elordada 26 qazan men 1 qarasha aralyǵynda «Quqyqtyq tártip» jedel-aldyn alý sharasy ótkizildi, dep habarlaidy "Ult aqparat".
«Politsiia qyzmetkerleri men Ulttyq ulannyń áskeri qyzmetshileri quqyqtyq tártipti qamtamasyz ete otyryp, táýlik boiy kóshelerde sholǵyndaý júrgizdi. Nur-Sultan qalasynda jedel-aldyn alý sharasy ótkizilgen 7 kúnniń ishinde 167 qylmys tirkelip, onyń 133-i izi sýymai ashyldy», - delingen Nur-Sultan qalalyq Politsiia departamenti taratqan aqparatta.
Máselen, kriminaldyq politsiia qyzmetkerleri 28 jastaǵy kisi tonaýshyny ustady. Kúdikti kúndizgi ýaqytta Gete kóshesi boiyndaǵy úilerdiń biriniń aýlasynda ótip bara jatqan turǵyndy soqqyǵa jyǵyp, tonap ketken. Ol zardap shegýshiniń aqshasyn tartyp alyp, ústindegi kúrteshesin sheship alǵan. Buzaqy iz sýymai qolǵa túsip, Politsiia departamentiniń ýaqytsha oqshaýlaǵyshyna qamaldy. QR Qylmystyq kodesiniń 191-baby 2-bóligi boiynsha sotqa deiingi tergeý júrgizilip jatyr.
«Sonymen qatar shara aiasynda buryn jasalǵan 79 qylmys ashylyp, izdeýde bolǵan 22 qylmysker ustaldy. «Quqyqtyq tártip» sharasy barysynda túrli ákimshilik quqyq buzǵany úshin shamamen 6 myń adam, onyń ishinde 933 adam spirttik ishimdik iship, tynyshtyqty buzǵany, 826 adam kishigirim buzaqylyq jasaǵany úshin jaýapkershilikke tartyldy», - dep atap ótedi departamentten.
