ەلوردادا 26 قازان مەن 1 قاراشا ارالىعىندا «قۇقىقتىق تەرتٸپ» جەدەل-الدىن الۋ شاراسى ٶتكٸزٸلدٸ, دەپ حابارلايدى "ۇلت اقپارات".
«پوليتسييا قىزمەتكەرلەرٸ مەن ۇلتتىق ۇلاننىڭ ەسكەري قىزمەتشٸلەرٸ قۇقىقتىق تەرتٸپتٸ قامتاماسىز ەتە وتىرىپ, تەۋلٸك بويى كٶشەلەردە شولعىنداۋ جٷرگٸزدٸ. نۇر-سۇلتان قالاسىندا جەدەل-الدىن الۋ شاراسى ٶتكٸزٸلگەن 7 كٷننٸڭ ٸشٸندە 167 قىلمىس تٸركەلٸپ, ونىڭ 133-ٸ ٸزٸ سۋىماي اشىلدى», - دەلٸنگەن نۇر-سۇلتان قالالىق پوليتسييا دەپارتامەنتٸ تاراتقان اقپاراتتا.
مەسەلەن, كريمينالدىق پوليتسييا قىزمەتكەرلەرٸ 28 جاستاعى كٸسٸ توناۋشىنى ۇستادى. كٷدٸكتٸ كٷندٸزگٸ ۋاقىتتا گەتە كٶشەسٸ بويىنداعى ٷيلەردٸڭ بٸرٸنٸڭ اۋلاسىندا ٶتٸپ بارا جاتقان تۇرعىندى سوققىعا جىعىپ, توناپ كەتكەن. ول زارداپ شەگۋشٸنٸڭ اقشاسىن تارتىپ الىپ, ٷستٸندەگٸ كٷرتەشەسٸن شەشٸپ العان. بۇزاقى ٸز سۋىماي قولعا تٷسٸپ, پوليتسييا دەپارتامەنتٸنٸڭ ۋاقىتشا وقشاۋلاعىشىنا قامالدى. قر قىلمىستىق كودەسٸنٸڭ 191-بابى 2-بٶلٸگٸ بويىنشا سوتقا دەيٸنگٸ تەرگەۋ جٷرگٸزٸلٸپ جاتىر.
«سونىمەن قاتار شارا اياسىندا بۇرىن جاسالعان 79 قىلمىس اشىلىپ, ٸزدەۋدە بولعان 22 قىلمىسكەر ۇستالدى. «قۇقىقتىق تەرتٸپ» شاراسى بارىسىندا تٷرلٸ ەكٸمشٸلٸك قۇقىق بۇزعانى ٷشٸن شامامەن 6 مىڭ ادام, ونىڭ ٸشٸندە 933 ادام سپيرتتٸك ٸشٸمدٸك ٸشٸپ, تىنىشتىقتى بۇزعانى, 826 ادام كٸشٸگٸرٸم بۇزاقىلىق جاساعانى ٷشٸن جاۋاپكەرشٸلٸككە تارتىلدى», - دەپ اتاپ ٶتەدٸ دەپارتامەنتتەن.
