Elordada tótenshe jaǵdai kezeńinde azyq-túlik pen turmystyq jiyntyqtar jeke tulǵalardyń shotyna aqshalai qarajatty aýdarý arqyly berilýde, dep habarlaidy QazAqparat.
Aita keteiik, Memleket basshysynyń tapsyrmasy boiynsha QR Eńbek jáne halyqty áleýmettik qorǵaý ministrligi tótenshe jaǵdai kezeńine azyq-túlik pen turmystyq jiyntyǵyn alýshylardyń tizimin keńeitti.
«QR Eńbek jáne halyqty áleýmettik qorǵaý ministrliginiń 2020 jylǵy 25 naýryzdaǵy 109-shy buiryǵyna sáikes, búgingi tańdaǵy tótenshe jaǵdaiǵa bailanysty tiisti sanattarǵa 4 ailyq eseptik kórsetkish mólsherinde áleýmettik járdemaqy tólenedi», - dedi Nur-Sultan qalasynyń Jumyspen qamtý jáne áleýmettik qorǵaý basqarmasy «Saryarqa» aýdany áleýmettik járdemaqylar taǵaiyndaý bóliminiń basshysy Saltanat Stanbaeva.
Osy oraida ol bul tólem birinshi jáne úshinshi toptaǵy múgedekterge, múgedek balalarǵa, sondai-aq bala jasynan múgedek balany kútip-baǵyp otyrǵandarǵa, sondai-aq ataýly áleýmettik kómek alatyn otbasynyń 6-18 jas aralyǵyndaǵy balalaryna jáne AÁK alatyn otbasynyń eresek adamdaryna qarastyrylǵanyn eske saldy.
«Bul járdemaqy árbir alýshynyń esepshotyna avtomatty túrde túsedi. Atap aitqanda, eshqaida barýdyń nemese habarlasýdyń qajeti joq. Esepshotqa 4 ailyq eseptik kórsetkish mólsherindegi járdemaqy aýdarylady», - dedi S. Stanbaeva.
Nur-Sultan ákimdiginiń málimetine qaraǵanda, tótenshe jaǵdai kezinde elorda turǵyndarynyń jekelegen sanattaryn azyq-túlik pen turmystyq jiyntyqtarmen qamtamasyz etý aqshalai tólem (4 AEK) túrinde qarastyrylǵan. Osy oraida TJ kezeńinde atalǵan tólem 30 myńnan astam qala turǵynynyń jeke esepshottaryna túsirildi.
Eske sala keteiik, 15 sáýirde QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń kezekti otyrysy ótti.
Jedeldikti jáne azamattardyń qaýipsizdigin qamtamasyz etý maqsatynda Memlekettik komissiia Eńbek jáne halyqty áleýmettik qorǵaý ministrligi engizgen azyq-túlik jáne turmystyq jiyntyqtardy jeke tulǵalardyń shotyna aqshalai qarajatty aýdarý arqyly berý týraly usynysty maquldady.
«Óńirlerdiń ákimdikteri usynylǵan tetikke sáikes kómekti alýshylarǵa aqshalai qarajattyń ýaqytyly aýdarylýyn qamtamasyz etýi kerek. Karta shottary bolmaǵan jaǵdaida nemese kómek alýshylardyń jasyna ne múgedektigine bailanysty kelýge múmkindigi bolmasa, sanitarlyq talaptardy saqtai otyryp, azyq-túlik jiyntyǵyn úige jetkizýdi qamtamasyz etý qajet», — dedi A. Mamin.
