19-23 shilde aralyǵynda elordada «Quqyqtyq tártip» jedel profilaktikalyq sharasy júrgizildi. Jol-kólik oqiǵalarynyń aldyn alý maqsatynda politseiler jol erejelerin buzǵan júrgizýshilerdi anyqtady, dep habarlaidy "Ult aqparat" Nur-Sultan qalalyq Politsiia departamentiniń baspasóz qyzmetine silteme jasap.
Jedel aldyn alý sharasynyń qorytyndysy boiynsha, Nur-Sultan qalasynda 4000-ǵa jýyq ákimshilik quqyq buzý faktisi anyqtaldy. Olardyń 33-i – mas kúiinde kólik quralyn basqarý faktisi. Kólik basqarý quqyǵynan aiyrylǵan 4 júrgizýshi ustaldy. Qarsy jolaqqa shyǵýdyń 19 faktisi anyqtaldy, júrgizýshilerdiń jaiaý júrginshilerge jol bermegeni qamtylǵan 112 fakti tirkeldi, 730 jaiaý júrginshi joldy tiisti emes jerden kesip ótken.
Jedel aldyn alý sharasy barysynda politsiiaǵa «Toyota» markaly avtokólikti mas júrgizýshi tizgindep kele jatqany týraly habar kelip túsken. Patrýldik politsiianyń mamandandyrylǵan batalonynyń qyzmetkerleri E-10 kóshesiniń boiynda avtokólikti toqtatty. Qujattaryn tekserý barysynda júrgizýshi AQSh azamaty ekeni anyqtaldy, avtokólik iesi tizginde óziniń tanysyna bergen eken. Kólik ishinen ishimdiktiń iisi shyǵyp turǵan. Júrgizilgen meditsinalyq saraptama qorytyndysy boiynsha júrgizýshi jeńil dárejede mas kúiinde bolǵany anyqtaldy.
Mamandandyrylǵan aýdanaralyq ákimshilik sotynyń qaýlysymen kólik júrgizýshisi men iesi arnaiy qabyldaý ornyna 15 táýlikke ornalastyryldy, sonymen qatar 7 jylǵa júrgizýshi kýáliginen aiyryldy. Kólik kommýnaldyq turaqqa ornatylǵan.
