19-23 شٸلدە ارالىعىندا ەلوردادا «قۇقىقتىق تەرتٸپ» جەدەل پروفيلاكتيكالىق شاراسى جٷرگٸزٸلدٸ. جول-كٶلٸك وقيعالارىنىڭ الدىن الۋ ماقساتىندا پوليتسەيلەر جول ەرەجەلەرٸن بۇزعان جٷرگٸزۋشٸلەردٸ انىقتادى, دەپ حابارلايدى "ۇلت اقپارات" نۇر-سۇلتان قالالىق پوليتسييا دەپارتامەنتٸنٸڭ باسپاسٶز قىزمەتٸنە سٸلتەمە جاساپ.
جەدەل الدىن الۋ شاراسىنىڭ قورىتىندىسى بويىنشا, نۇر-سۇلتان قالاسىندا 4000-عا جۋىق ەكٸمشٸلٸك قۇقىق بۇزۋ فاكتٸسٸ انىقتالدى. ولاردىڭ 33-ٸ – ماس كٷيٸندە كٶلٸك قۇرالىن باسقارۋ فاكتٸسٸ. كٶلٸك باسقارۋ قۇقىعىنان ايىرىلعان 4 جٷرگٸزۋشٸ ۇستالدى. قارسى جولاققا شىعۋدىڭ 19 فاكتٸسٸ انىقتالدى, جٷرگٸزۋشٸلەردٸڭ جاياۋ جٷرگٸنشٸلەرگە جول بەرمەگەنٸ قامتىلعان 112 فاكتٸ تٸركەلدٸ, 730 جاياۋ جٷرگٸنشٸ جولدى تيٸستٸ ەمەس جەردەن كەسٸپ ٶتكەن.
جەدەل الدىن الۋ شاراسى بارىسىندا پوليتسيياعا «Toyota» ماركالى اۆتوكٶلٸكتٸ ماس جٷرگٸزۋشٸ تٸزگٸندەپ كەلە جاتقانى تۋرالى حابار كەلٸپ تٷسكەن. پاترۋلدٸك پوليتسييانىڭ مامانداندىرىلعان باتالونىنىڭ قىزمەتكەرلەرٸ ە-10 كٶشەسٸنٸڭ بويىندا اۆتوكٶلٸكتٸ توقتاتتى. قۇجاتتارىن تەكسەرۋ بارىسىندا جٷرگٸزۋشٸ اقش ازاماتى ەكەنٸ انىقتالدى, اۆتوكٶلٸك يەسٸ تٸزگٸندە ٶزٸنٸڭ تانىسىنا بەرگەن ەكەن. كٶلٸك ٸشٸنەن ٸشٸمدٸكتٸڭ يٸسٸ شىعىپ تۇرعان. جٷرگٸزٸلگەن مەديتسينالىق ساراپتاما قورىتىندىسى بويىنشا جٷرگٸزۋشٸ جەڭٸل دەرەجەدە ماس كٷيٸندە بولعانى انىقتالدى.
مامانداندىرىلعان اۋدانارالىق ەكٸمشٸلٸك سوتىنىڭ قاۋلىسىمەن كٶلٸك جٷرگٸزۋشٸسٸ مەن يەسٸ ارنايى قابىلداۋ ورنىنا 15 تەۋلٸككە ورنالاستىرىلدى, سونىمەن قاتار 7 جىلعا جٷرگٸزۋشٸ كۋەلٸگٸنەن ايىرىلدى. كٶلٸك كوممۋنالدىق تۇراققا ورناتىلعان.
