Biyl óziniń 60 jyldyq mereitoiyn atap ótetin «Qazaqkontsert» uiymy Abaidyń 175 jyldyǵyna orai uly aqynnyń jańa ekskliýzivti músinin tanystyrdy, dep habarlaidy QazAqparat.
Músin balaýyz ben silikon materialdarynan jasalǵan. Elimizde sirek kezdesetin giperrealistik baǵyttaǵy músinniń avtory – talantty sýretshi ári músinshi Aidos Esmaǵambetov. Ol buǵan deiin Elbasy Nursultan Nazarbaevtyń, Barak Obamanyń, Abylai hannyń jáne general-polkovnik Saǵadat Nurmaǵambetovtiń giperrealistik músinderin jasaǵan.
«Biyl uly oishyl, kemeńger aqyn Abaidyń 175 jyldyǵy elimizde keńinen atap ótilýde. Aqynnyń baǵa jetpes eńbekterin dáripteý – bizdiń azamattyq paryzymyz. Abaiǵa degen qurmetimizdiń bir belgisi, uly aqynnyń tulǵasyn dáripteýge arnalǵan is-sharanyń biri – Abai músininiń tusaýkeseri. Qazaqstanda balamasy joq jańa týyndynyń avtory – giperrealist músinshi, «Qazaqkontsert» uiymynyń sýretshisi, 100 jańa esim jobasynyń jeńimpazy Aidos Esmaǵambetov. Ol bul músindi biyl 60 jyldyq mereitoiyn atap ótken «Qazaqkontsert» uiymyna tartý etip otyr. Mańyzdy eki mereitoidy bir-birimen osylaisha bailanystyryp, barsha qazaq eline erekshe syi jasaǵan Aidosqa alǵys aitamyz. Abaidyń tulǵasy osylai jańa qyrynan nasihattalýda. Bul músin bolashaqta Ulybritaniiadaǵy madam Tiýsso mýzeiinen oryn alady dep senemiz», - deidi «Qazaqkontserttiń» direktory, Qazaqstannyń eńbek sińirgen qairatkeri Jeńis Seidollauly.
Aidos Esmaǵambetrovtyń aitýynsha, uly Abaidyń osy músinin jasaýǵa tórt ai ýaqyt ketken. Músinge qajetti keibir material Qazaqstanda satylmaidy, sondyqtan ony shetelden satyp alýǵa týra kelgen.
«Bul músindi jasaý úshin Abaidyń sýretiniń túpnusqasy kerek boldy. Internette onyń sýretteri men beinesi kóp. Biraq ol sýretterdi ulǵaitqan kezde buldyrap ketedi de, ony anyq qaraý múmkindigi bolmaidy. Sondyqtan Abai murajaiyna habarlasyp, Abaidyń túpnusqa sýretin suradym. Sondai-aq, sol kezeńmen sáikes kelýi úshin arnaiy shapanǵa da tapsyrys berdim», - deidi ol.
