Búgin L.N. Gýmilev atyndaǵy Eýraziia Ulttyq ýniversitetinde belgili memleket jáne qoǵam qairatkerleriniń qatysýymen «Abai murasy» respýblikalyq ǵylymi-tájiribelik konferentsiiasy ótti, dep habarlaidy QazAqparat.
Is-shara uly oishyldyń jańarǵan qoǵamnyń qalyptasý negizderi baǵytyndaǵy muralaryn, sondai-aq «Máńgilik el» ideiasy aiasynda «kemeldengen tulǵa» tujyrymdamasyn zertteýge baǵyttalǵan. Konferentsiiaǵa belgili memleket jáne qoǵam qairatkerleri, Abai shyǵarmalaryn zertteitin ǵalymdar qatysty.
Sharaǵa uly aqynnyń týǵan jerinen Shákárim ýniversiteti janyndaǵy Abai institýtynyń direktory Jandos Áýbákir keldi. Ǵalymnyń aitýynsha, Abai murasyn zertteý bir kúnmen ǵana shektelmeidi, onyń eńbekteri árqashan ózekti bolyp qala bermek.
«Búgin Eýraziia ulttyq ýniversitetinde Abaidyń ómiri men shyǵarmashylyǵyna arnalǵan mańyzdy konferentsiia ótip jatyr. Is-sharanyń elordadaǵy iri ýniversitetterdiń birinde ótýi qisyndy jáne óte oryndy. Osy ýniversitettiń qabyrǵasynda «Abai akademiiasy» ǵylymi-zertteý institýty quryldy. Institýt Abaidyń muralaryn zertteý boiynsha kóp jumys jasady. EUÝ rektory Erlan Sydyqovtyń jetekshiligimen túrli kitaptar men jinaqtar shyǵaryldy. Abai murasyn zertteý bir kúnmen ǵana shektelmeidi. Biz árqashan onyń shyǵarmalaryn, ómirge degen kózqarastaryn zertteýimiz kerek, bul úshin tereń bilim qajet. Onyń shyǵarmalary búgingi kúnge deiin ózektiligin joǵaltqan joq. Jyl saiyn biz ol týraly qyzyqty faktilerdi tabamyz. Birneshe jyl buryn biz muraǵattan onyń bolys basqarýshysy retinde qyzmetin rastaityn qujatty taptyq. Abaidyń airyqsha ereksheligi - ol óziniń ádebi mektebin qalyptastyrdy, biz osy mekteptiń ókilderin de zerttedik», - deidi Jandos Áýbákir.
L.Gýmilev atyndaǵy EUÝ-diń qazaq ádebieti kafedrasynyń meńgerýshisi Kemeńger Qaiyrbek Abai árbir qazaqstandyqtyń júreginde ómir súretinin atap ótti.
«Búginde respýblikanyń túkpir-túkpirinde ǵalymdar, abaitanýshylar bar. Is-shara Abai jylyn ǵylymi qorytýǵa baǵyttalǵan. Abai árbir qazaqstandyqtyń júreginde. Biyl ýniversitetimizde Abai institýty quryldy, abaitaný týraly 20-ǵa jýyq kitap jaryq kórip, tusaýkeseri ótti. Abai HH ǵasyrdyń basynda Alash partiiasynyń basshylyǵymen zertteldi. Muraǵattyq málimetter sol kezde óńdelgen bolatyn», - deidi ǵalym.
Konferentsiiada QR Parlamenti Senatynyń depýtaty Nurtóre Júsip, Sh.Ýálihanov atyndaǵy Tarih jáne etnologiia institýtynyń direktory Ziiabek Qabýldinov jáne basqa da ǵalymdar baiandama jasady. Respýblikalyq ǵylymi-praktikalyq konferentsiianyń qorytyndysy boiynsha Abai murasyna arnalǵan ǵylymi zertteýler jinaǵy tanystyryldy.
