Elorda turǵyndary karantin rejiminiń shekteý sharalaryna qaramastan otbasylyq otyrystardy ótkizip jatyr, dep habarlaidy "Ult aqparat".
Máselen, Nur-Sultan qalalyq Politsiia departamentiniń málimetinshe, keshe, 18 qazan kúni saǵat 17.10-da politsiia qyzmetkerleri «QUMAN» meiramhanasynda bastalǵan 50 jyldyq mereitoidy toqtatqan. Otyrys endi qyzǵan sátte meiramhanaǵa Taýarlar men kórsetiletin qyzmetterdiń sapasy men qaýipsizdigin baqylaý basqarmasy, ákimdik pen Nur-Sultan politsiiasy ókilderinen turatyn mobildi top kirip kelip, kóńildi keshtiń odan ary jalǵasýyna múmkindik bermedi.
«Meiramhana iesi men sharany uiymdastyrýshy shekteýlerdi elemei, adamdardyń densaýlyǵyna qaýip tóndirdi. Meiramhana iesi men merekelik otyrysty uimdastyrýshyǵa qatysty jinalǵan material QR Ákimshilik quqyq buzýshylyq týraly kodekstiń 424-babymen ákimshilik jaýapkershilikke tartý úshin Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi», - dep atap ótedi vedomstvodan.
Departament aqparatyna qaraǵanda, bir táýliktiń ishinde mobildi top 132 kásipkerlik sýbektisin tekserip, karantin rejimin buzýdyń 36 faktisin anyqtaǵan.
