Nur-Sultan qalasy Bilim basqarmasynyń basshysy Sholpan Qadyrova oqý jylynyń birinshi toqsanyn qorytyndylady, dep habarlaidy QazAqparat.
«Birinshi toqsan qashyqtan oqytý formatynda ótkenin bilesizder. Sonymen birge, ata-analardyń ótinishimen bastaýysh synyp oqýshylary sanitarlyq-epidemiologiialyq normalardy saqtai otyryp, kezekshi synypta oqydy. Qala mektepterinde 1-4 synypqa deiin barlyǵy 3 011 kezekshi synyp ashylyp, onda 40 myńnan astam oqýshy bilim aldy. Al qashyqtan oqytý úshin bilim uiymdary sinhrondy jáne asinhrondy sabaqtar ótkizetin otandyq Online Mektep, Daryn.online internet platformalaryn paidalandy», - dep atap ótti basqarma basshysy qala ákimdiginde ótken brifingte.
Onyń aitýynsha, 79 mektep Online Mektep platformasynda, 32 mektep – Daryn.online platformasynda jumys istegen. 29 mektep – eki platformany da paidalanǵan.
Odan bólek, qashyqtan oqytý formatyn júzege asyrý úshin Microsoft Teams, Google Meet, EduPage jáne taǵy basqa platformalar paidalanyldy.
Barlyq pedagogtar men oqýshylar Microsoft Teams tegin akkaýnttarymen qamtamasyz etildi. Jáne mektepterde asinhrondy sabaq ótkizý úshin Kundelik.kz portaly belsendi qoldanylǵan.
«Alǵashqy toqsanda kezikken másele – qashyqtan oqytý formatynda bir synyptaǵy muǵalimderdiń ártúrli platformada jumys isteýi boldy. Bul oqýshylardyń sabaqqa qosylýyn qiyndatty. Osyǵan bailanysty muǵalimderge qosymsha seminarlar ótkizildi jáne másele sheshildi. Endi ár synyp tek bir platformada jumys isteidi», - dedi Sholpan Qadyrova.
