Elordada qurylysy uzaqqa sozylǵan «Altyn Shar» turǵyn úi kesheniniń №1 blogyndaǵy jumystar aiaqtalyp, 200 otbasyǵa páter kilti tabystaldy. Bul jaiynda Nur-Sultan qalasynyń ákimi Altai Kólginov Instagram paraqshasynda jazdy, dep habarlaidy "Ult aqparat".
«Jumys kúni aiaqtalǵan soń úleskerlermen kezdestim. «Altyn shardy» alǵash kórgen kezde qurylysy múlde toqtap turǵan bolatyn. «GLB» úi qurylysy kombinatynyń qurylysshylar men kreditorlar aldynda milliondaǵan qaryzdary boldy. Kóppáterli turǵyn úi kesheni úsh bloktan turady. Mundaǵy jumystar qaita jańǵyrtyldy. Memleket tarapynan qurylys kombinatynyń jumysynyń qaita jandanýyna kómek kórsetildi. Úidiń birinshi blogynyń qurylysy aiaqtalyp, paidalanýǵa berildi. «Altyn Shar« (blok №1) úleskerlerine kiltter berilip, qujattar rásimdele bastady. Bul – shamamen 200 otbasy. Otbasylardyń bir bóligi kópten kútken baspanaǵa kirip úlgerdi», - dedi qala basshysy.
Onyń atap ótýinshe, osy jyldyń sońyna deiin atalǵan turǵyn úidiń ekinshi blogyn aiaqtaý josparlanǵan. Sol kezde taǵy 200 úleskerdiń máselesi sheshiledi.
«Al úshinshi bloktaǵy jumystardy kúsheĭtýdi tapsyrdym. Ol jerde 218 otbasy páterin kútip otyr. Úige ýaqytsha kirme joldar saldyq, qurylys jumystary aiaqtalǵannan keiin aýmaqty abattandyrýǵa kirisemiz. Sonymen birge qurylys kombinaty «Baǵystandy« aiaqtaý men áleýmettik qoljetimdi turǵyn úi qurylysyna jumyldyrylǵan. Úi qurylysy kombinatynyń jumysyn qaita jańǵyrtý sapaǵa nuqsan keltirmei, úilerdiń az ýaqytta salyp shyǵýǵa jáne sharshy metrdiń ózindik qunyn tómendetýge múmkindik beredi», - dep jazdy Altai Kólginov.
