Nur-Sultan qalalyq politsiia departamentiniń baspasóz qyzmeti jelide taraǵan videoǵa qatysty túsinikteme berdi. Onda er adam oiyn alańynda balalardy bir-birimen tóbelesýge májbúrlegen, dep habarlaidy "Ult aqparat".
«Áleýmettik jelilerge júrgizilgen monitoring jumystary barysynda er adamnyń balalardy tóbelesýge májbúrlegen videosy anyqtaldy. Atalǵan fakti boiynsha politsiiaǵa 37 jastaǵy qala turǵyny jetkizildi. Ol Babataiuly kushesindegi oiyn alańynda óziniń 8 jastaǵy balasy men ony renjitken 11 jastaǵy balany tóbelesýge shaqyrǵan», - dep málimdedi Nur-Sultan qalalyq Politsiia departamentiniń baspasóz qyzmeti.
Tóbeles saldarynan 11 jastaǵy bala jaraqat alǵan. Zardap shekken balanyń anasynan kináli azamatqa shara qoldaný týraly aryz tústi.
Politsiia sonymen qatar er adamnyń ákimshilik jaýapqa tartylǵanyn habarlady. Is materialdary protsessýaldyq sheshim shyǵarý úshin mamandandyrylǵan aýdanaralyq sotqa joldandy.
Nur-Sultan qalasynyń Politsiia departamenti eresekter tarapynan mundai qadamdarǵa jol berilmeitinin eskertedi. Qoldanystaǵy zańnamaǵa bailanysty balalardyń quqyqtarynyń buzylǵany, olardyń densaýlyǵyna zaqym keltirgeni úshin jaýapkershilik qarastyrylǵan.
