Nur-Sultan qalasynyń tártip saqshylary bir saýda úiinde 6 ret urlyq jasaǵan er adamdy ustady, dep habarlaidy "Ult aqparat" Politsiia departamentiniń baspasóz qyzmetine silteme jasap.
Politsiia departamentine saýda úilerdiń birindegi birneshe satýshydan aryz túsken. Tártip saqshylary taýarlar men jeke zattardyń urlyǵyna qatysty jedel izdestirý jumystaryn júrgizip, nátijesinde 53 jastaǵy elorda turǵynyn ustady.
«Tergeý barysynda anyqtalǵandai, kúdikti araǵa birneshe kún salyp bir saýda úiinen 6 ret urlyq jasaǵan. Ol saýda úiinde býtikke klientter kirgen kezde satýshynyń soǵan qyzmet kórsetip jatqan sátin paidalanyp, «HUAWEI» markaly telefonyn urlap ketken. Alaida urlyq faktisi býtiktegi beinebaqylaý kamerasyna túsip qalǵan. Er adam oǵan deiin de urlyq jasaǵan», - delingen habarlamada.
Kúdikti osylaisha uialy telefon, tósek japqyshty, taǵy basqa taýardy urlap úlgergen. Jartysyn satyp jibergen. Satýshylarǵa 500 myń teńgege jýyq shyǵyn keltirgen.
Atalǵan is boiynsha Qylmystyq kodekstiń 188-babymen qylmystyq is qozǵaldy. Kúdikti qamaýǵa alyndy.
