Elorda ákimi Altai Kólginov bir aptanyń ishinde 30 otbasyn qabyldap, turǵyndardyń 90-ǵa jýyq suraǵyna jaýap berdi, dep habarlaidy "Ult aqparat".
«Bir aptanyń ishinde azamattardy eki márte qabyldadym. Bul shamamen 30 otbasy, 90-ǵa jýyq suraq tústi. Suraqtardyń deni baspana, meditsinalyq kómek, jumyspen qamtý, turǵyn alaptaryn damytý máselelerine qatysty boldy. Bizde 16 turǵyn alaby bar. Onda qalanyń ár tórtinshi turǵyny meken etip jatyr. Biyl osy turǵyn alaptarda birqatar aýqymdy jumys atqaryldy: 100-den asa kóshege asfalt tóselip, demalys oryndaryn qurý úshin 40 qoǵamdyq keńistik pen aýla abattandyryldy (Kóktal-1, Kóktal-2, Agroqalashyq, Internatsionalnyi, Óndiris jáne t.b.). Sonymen qatar Michýrinoda keń mektep ashyldy. Buryn bul turǵyn alapta birde-bir bilim oshaǵy bolmaǵan edi. Eldi mekenderde áli de mektep, meditsinalyq mekeme, deneshynyqtyrý-saýyqtyrý keshenderin jáne taǵy basqa nysandardy salyp jatyrmyz», - dep jazdy qala ákimi Instagram akkaýntynda.
Sondai-aq ol 13,5 shaqyrym injenerlik jeli, 5 shaqyrymnan asa káriz ben sý qubyry, 3 shaqyrymnan asa nóser kárizi salynǵanyn atap ótedi.
«Injenerlik jelisiz órkeniettiń bolmaityny belgili. Sodan soń jyly aialdamalardy ornatý jáne ony jaryqtandyrý, jańa avtobýs marshrýttaryn iske qosý siiaqty máseleler taǵy bar. Prezidenttiń tapsyrmasy boiynsha keler 2021 jyly shetki aĭmaqtarǵa erekshe kóńil bólinedi. Qazir sonyń jobasy ázirlenýde. Orynbasarlaryma, aýdan ákimderine jáne basqarma basshylaryna jyl sońyna deiin aldyn ala qabyldaýǵa jazylǵan azamattardyń kezegin tezirek jyljytýdy tapsyrdym», - dedi Altai Kólginov.
