Búgin Nur-Sultan qalasynyń qylmystyq ister jónindegi mamandandyrylǵan aýdanaralyq soty adam aǵzasyn zańsyz aýystyrýǵa qatysty isti qarady, dep habarlaidy "Ult aqparat".
Nur-Sultan qalalyq sotynyń málimetinshe, B.Taisalovanyń 2017-2018 jyldary aralyǵynda Qazaqstandaǵy sheteldik kompaniianyń múddelerin bildire otyryp, qazirgi ýaqytta halyqaralyq izdeýde júrgen adamdarmen aldyn ala sóz bailasý arqyly áreket etkeni anyqtaldy. B.Taisalova olarǵa tiri adamdardyń organdaryna qatysty zańsyz mámileler jasaýǵa kómektesken. Bul rette, donor men retsipienttiń týystyq bailanystary týraly jalǵan qujattardy paidalanyp, notarialdy resimdelgen kelisim týraly óteýsiz málimdemelerdi Qazaqstannyń meditsinalyq mekemelerine usynǵan. Solardyń negizinde aǵzalardy aýystyryp ornalastyrý júrgizilgen.
Sondai-aq transplantatsiiany júzege asyratyn dárigerler G. Quttymuratov pen A.Donbai qujattardyń jalǵandyǵy týraly bilmeitini anyqtaldy. Aǵzalardy aýystyryp ornalastyrý boiynsha barlyq operatsiialar tiisti qujattardy resimdei otyryp, resmi túrde júrgizilgen. Operatsiialarǵa aqy tóleý meditsinalyq mekemeniń býhgalteriiasy arqyly oryn alǵan.
Osyǵan bailanysty Quttymuratov pen Donbai aǵzalardy zańsyz aýystyrýda kinásiz dep tanyldy. Alaida, Quttymuratov júrgizgen aǵzalardy aýystyryp salý operatsiiasynan keiin patsient VICh juqtyrǵan, iaǵni sońǵysy óz mindetterin tiisinshe oryndamaǵan.
Taisalova QK-niń 28-baby 5-bóligi, 116-babynyń 2-bóligi 3,4-tarmaqtary, 385-babynyń 3-bóligi boiynsha 6 jylǵa bas bostandyǵynan aiyryldy (jaza 6 jyl 8 aidan aspaýy kerek). Quttymuratov QK-niń 317-baby 5-bóligi boiynsha 2 jyl 6 aiǵa bas bostandyǵynan aiyryldy (barynsha eń joǵary jaza).
Úkim zańdy kúshine engen joq.
