Nur-Sultan politseileri kópirden sekirmek bolǵan er adamdy qutqaryp qaldy, dep habarlaidy "Ult aqparat" elordalyq politsiia departamentiniń baspasóz qyzmetine silteme jasap.
Keshe keshki 19:15 kezinde Nur-Sultan qalasynyń Jedel basqarý ortalyǵyna kólikke janarmai quiý stansasynyń qasyndaǵy kópirden er adamnyń sekirýge árekettenip turǵany týraly habarlama kelip túsken.
Patrýldik politsiianyń eki ekipajy oqiǵa ornyna úsh minýtta kelip jetti.
Jas jigit kópir taianyshyn ustap, temir jolǵa sekirýge daiyndalyp turdy. Jaǵdaidy baǵalaǵan politseiler jigitpen alystan sóilesip, kóńilin basqaǵa aýdarmaq boldy.
Osy ýaqytta patrýldik politsiia qyzmetkeri Jandos Turashev ońtaily sátti paidalanyp, jigitke jaqynyraq kelip, ony qatty qapsyryp ustap aldy.
Jas jigit qarsylyq tanytyp, bastaǵan isin aiaqtamaq bolǵan. Politseilerdiń jedel ári retke keltirilgen is-áreketiniń arqasynda er adamnyń ómiri aman qaldy.
Elordanyń 26 jastaǵy turǵyny qalalyq aýrýhanaǵa jetkizildi, munda oǵan meditsinalyq jáne psihologiialyq kómek kórsetildi.
