Aqmola oblysynyń elorda mańyndaǵy eldi-mekenderde turatyn aýqatty adamdardyń úilerin tonap kelgen urylar toby ustaldy, dep habarlaidy "Ult aqparat" oblystyq PD baspasóz qyzmetine silteme jasap.
Vedomstvonyń málimetinshe, urylar Nur-Sultan qalasy jáne Qostanai, Túrkistan oblystarynan kelgen. Jedel izdestirý sharasy kezinde Tselinograd aýdany aýmaǵynda múlik urlaýdyń birneshe oqiǵasyna qatysy bar qylmystyq toptyń músheleri ustaldy. Tselinograd aýdandyq PB kriminaldyq politsiia qyzmetkerleri ustalǵan 20-24 jastaǵy úsh er adamnyń (buryn sotty bolǵan) Qosshy jáne Talapker aýyldarynda aýqatty adamdardyń úiin tonaǵanyn anyqtap otyr.
«Kúdiktiler tonaityn úiine aldyn ala baryp, málimet jinaǵan. Keshkilik ýaqytta úi ieleriniń joqtyǵyn paidalanǵan olar tereze arqyly túsip, áshekei buiymdar, aqsha jáne qundyz ton siiaqty baǵaly zattardy tonaǵan. Kúdiktiler jalǵa alǵan kólikpen júrgen jáne Nur-Sultan qalasyndaǵy qonaqúilerde turǵan», - deidi vedomstvodan.
PD baspasóz qyzmeti atap ótkendei, qazirgi kezde osy oqiǵaǵa qatysty QR QK 188-baby boiynsha sotqa deiingi tergeý amaldary júrip jatyr Kúdiktiler ýaqytsha ustaý izoliatoryna qamaldy.
«Kúdiktilerdiń 11 urlyq qylmysyna qatysy bary anyqtaldy. Sonymen qatar, ózge óńirlerdegi osyǵan uqsas qylmystarǵa qatysy bar-joǵy anyqtalý ústinde», - dep tolyqtyrdy vedomstvodan.
