Nursultan Nazarbaev halyqaralyq áýejaiynyń atqarýshy direktory Dáýlet Hamzin karantinnen keiingi alǵashqy Almatydan ushyp keletin reiske daiyndyq týraly aitty, dep habarlaidy QazAqparat.
«Áýejai 30 naýryzda jabyldy, sońǵy jolaýshylar reisine qyzmet kórsettik. Qazir 1 mamyrda Almaty – Nur-Sultan alǵashqy jolaýshylar reisin qarsy alyp jatyrmyz. Biz barlyq qajetti sharalardy jasadyq: áýejai ǵimaratyna kireberiste arnaiy post qoiyldy jáne teris nátije kórsetken COVID-19 anyqtamasy bar jolaýshylar ǵana kire alady. Barlyq jolaýshylar tek maskamen jáne qolǵappen kirgizilip jatyr. Áýejaidyń barlyq jerinde arnaiy qashyqtyq saqtalyp, sanitaizerler qoiylǵan», - dedi Dáýlet Hamzin áýejaida jýrnalistermen kezdesýde.
«Kúnine eki ret tazalaý jumystary júrgizilip, barlyq negizgi oryndar dezinfektsiialanýda. Áýejai jolaýshylar men reisterge qyzmet kórsetýge daiyn dep esepteimiz. 170 óndiristik personal reisterge qyzmet kórsetip jatyr. Ár aýysymda 40 adam shyǵady», - dedi spiker.
Onyń aitýynsha, áýejaidyń jumys istemeýine bailanysty aviatsiialyq jáne aviatsiialyq emes kirister nólge jaqyndap, kásiporyn belgili bir shyǵynǵa ushyraǵan.
«Shyǵynnyń naqty kólemi eseptelip jatyr. Budan bólek, áýejai sanitarlyq-epidemiologiialyq sharalardy qamtamasyz etýge, onyń ishinde qyzmetkerler úshin dezinfektsiialaý quraldaryn, jeke qorǵaný quraldaryn, kostiýmderdi, sanitaizerlerdi jáne taǵy basqa zattardy satyp alýǵa aitarlyqtai qomaqty qarajat jumsaǵan. Karantinge deiin táýligine 200 reiske qyzmet kórsettik. Karantin kezinde ortasha eseppen táýligine 20 reis boldy. Áýejai bos turǵan joq. Biz tranzittik jáne júk reisterin tartý boiynsha kóptegen jumystar atqardyq. Gýmanitarlyq reisterge qyzmet kórsettik», - dep túiindedi D.Hamzin.
Eske salaiyq, búgin Almaty men elorda arasynda áýe qatynasy jandandy.
Budan bólek, 4 mamyrdan bastap Qazaqstanda birqatar áýe reisteri qaita iske qosylady.
